UMuduhwa, Andrew Mbeba, Nqobizitha Masuku, loSilla sebetshiya iBosso

19 Aug, 2021 - 00:08 0 Views
UMuduhwa, Andrew Mbeba, Nqobizitha Masuku, loSilla sebetshiya iBosso

uMthunywa

Nkosilathi Sibanda
KUQALE ngonozinti u-Ariel Sibanda ukubika ukuthi usesuka kuHighlanders, ngoLwesithathu, sokuvele ukuba abanye abadlali abathathu uPeter Muduhwa, Adrian Silla, Andrew Mbeba loNqobizitha Masuku sebelubhekise kuqembu le-Chicken Inn.

Iphephandaba likazulu liyakuveza ukuba abadlali laba bafunwa ngumqeqetshi we-Chicken Inn uJoey Antipas ngamehlo abomvu. Umqeqetshi lo uthiye kuBosso kanje ngoba elakhe iqembu selivule amathuba kubadlali abatsha.

U-Antipas wake wabika ngesizini ka2019 ukuthi ufuna ukuthenga uMuduhwa. Ngaleso isikhathi imali yayisekhona kuHighlanders ngoba imvimbi kuzwa le yakhetha ukuthi ihlale kwekaMatshobana.

UMuduhwa wayethenjiswe isivumelwano semali lokuthengelwa indlu.

Ngokuzwa kwentatheli, sekuthe dlwe kuMuduhwa nanko laye ubike ukuba angeke alahle ithuba lokubizwa liqembu elinjenge-Chicken Inn.

IChicken Inn yona idinga imvimbi labafana abasakhulayo abalomdladla ngoba inengi labadlali elabo sebekhulile njalo lethalenta seliphela.

Omunye wabafakazi abaqotho okhulume loMthunywa uthe loba kungakabekwa emphakathini, u-Antipas uyabafuna abadlali beBosso.

“Akubuzwa muntu, umqeqetshi wethu wakubika ukuthi nxa abadlali ababalisa uPeter Muduhwa, Nqobizitha Masuku, Adrian Silla loAndrew Mbeba bengatholakala, uyabafuna. Kuzwakele ngoLwesithathu ukuba abadlali laba sebephose amajogwe phansi kuHighlanders.

“Sisakhangele kodwa iqiniso yilo. UAntipas uyabafuna abadlali laba,” kutsho umfakazi oyisiphathamandla osebenza kuqembu leChicken Inn.

“Umqeqetshi ukubona kulithuba elihle ukuthi aqinise iqembu lakhe. Inhloso yikuthi mhla inkundla zivulwa, abelolonge abadlali abasehlelweni lwakhe.”

Intatheli yephephandaba likazulu izame ukuxhumana labadlali asebesuka kuBosso laba, bayala ukuthi baqanjwe ngoba besesaba ukuba ukuveza ngekusasa labo kuzadala inzondo eqenjini.

Omunye wabo uthe: “Wonke umuntu uyazi isimo esikuso. Silambile. Nxa kuvuleka amathuba siyasuka la.”

NgoLwesibili uMthunywa ubike ukuthi unozinti wodumo uAriel Sibanda usetshiyile kuBosso.

Unozinti lo, owavimbela iBosso okweminyaka elitshumi  lantathu usevalelisile wabika ukuba okwakhe laleliqembu sekuphelile.

USibanda, obengunozinti aphinde abengukaputeni. Wangena kuqembu ngo-2009.

Ukungabhadalwa iholo phose okwenyanga ezine sekudale ukuthi u-Mangoye atshiye kuqembu leHighlanders.

Umdlali lo ukhethe ukwazisa abalandeli bakhe ebulenjini ekuseni ngoLwesibili.

“Ngidanile ngoba sengitshiya iqembu. Bengikuthabela ukuthi ngivalelise phambili kwenkundla egcweleyo eBF…,” kutsho uAriel “Mangoye” Sibanda ngokufulathela kwakhe iqembu leHighlanders.

Abaphathi bewofisi yezokukhutshwa kwembiko kuHighlanders abazange badobhe ucingo ngesikhathi kudingwa umbono wabo.

USibanda usuke kuTshilamoya ephethe isicoco sokuba ngunozinti owedlula bonke kuligi yePSL.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds