uMthunywa
Bongani Ndlovu
LIPHOSE lafela amafufu okwegundanwe elinye ijaha leMaphisa ngoLwesihlanu ngemva kokuba litshaywe ngumtshayeli womtshova oke wadla ubhedu kuzindaba kuthiwa kwakhithika inyoka emtshoveni wakhe eMaphisa kumaviki ambalwa edluleyo.
Iphephandaba likazulu like lakhipha indaba kamtshayeli lo uJabulani Dube okubikwa kwakhithika inyoka emtshoveni wakhe waphanga wayidobha wazama ukuyibuyisela emtshoveni wakhe andubana abantu bayithathe bayitshise.
Kubikwa ngemva kwaleso sehlakalo uDube waqala ukuthintana loMnumzana Thulani Ngwenya emethesa icala lokuveza imfihlo yakhe kumaphephandaba, wamthembisa ukuthi uzamtshaya okwabangela ukuthi uNgwenya ayecatsha enkambeni yamapholisa.
Ekhuluma lephephandaba likazulu uMnu Thulani Ngwenya ubike ukuba impilo yakhe ayisaphephanga ngoba edingwa ngabatshayeli bomtshova.
“Khathesi ngicatshile enkambeni yamapholisa ngemva kokuphosa ukutshaywa ngabatshayeli bomtshova bengethesa icala lokuthi yimi engathengisa indaba yenyoka eyakhithika emtshoveni kumaphephandaba,” kutsho uNgwenya.
“Ngazama ukuba chazela kusukela ngelanga beqala ukungithinta bengethesa lelocala ngabatshela ukuba le yinto egcwele emafonini abantu kodwa bala baqhubeka bengethesa lelo cala,” kuchaza uMnu Ngwenya.
Uthe usehlala esevalweni ngemva kokuthenjiswa ukuthi uzatshaywa.
“Besengilamaviki amabili ngilala ubuthongo bomvundla ngemva kokuba ngathenjiswa ukutshaywa ngumtshayeli womtshova owakhithika inyoka kuwo emavikini amabili adluleyo,”
“Ukulala endlini bengilala kodwa ngokungazi ukuba ilanga elikhethiweyo yiliphi ukulala kwami bekusiba nzima obekubangela ukuba kucine kusile amanye amalanga ngingalalanga,” kuveza uNgwenya.
Intatheli ixhumane lo Dube omane wakhwaza ethi uzatshaya intatheli ingabe ilokhu imbuza imbuzo engapheliyo.
“Ungabe ulokhu ungifonela ngizakutshaya njengomngane wakho uThulani,” kutsho uDube.
