Uncategorized

Umtshado ntsi sekubhuqwa abantu

12 Dec, 2019 - 00:12 0 Views
Umtshado ntsi sekubhuqwa abantu

uMthunywa

Ethel Ncube

ZISELE zitshotshobele izakhamizi zeQhakala, eMbembesi ngempelaviki ngemva kokuba elinye iqula lezigilamkhuba eselihluphile lifike lahaza umakoti ngenhlabathi andubana litshaye abantu abalapho okubangele ukuthi kuchitheke umtshado. 

UMthunywa uzwe ukuthi iqula lezigilamkhuba leli lifike lahaza umntaka-Nono Khumalo obengumakoti, yena okungasatholakalanga igama lakhe obetshada lejaha elivela elizweni leZambia ngenhlabathi andubana kube yisiwowowo okubangele ukuthi umtshado ucine umiswa.

Ekhuluma lentatheli omunye wezakhamizi zakule indawo uMnumzana Deon Ndlovu uveze ukuba bacina bengasaqedanga kuhle umtshado ngoba sekuyisiphithiphithi.

“Abafana laba basenzela okunye, bafika benganxuswanga bengathi bayagida kanti babesazi ukuthi bajonge ukuzochitha umtshado.

“Baqala begida kuhle, bathela umakoti ngenhlabathi andubana baqale ukutshayana bacina sebetshaya wonke umuntu owayelapho kungasadlalwa okwenza abantu bagijima basabalala bedinga lapho abangacatsha khona ukuze  bangatshaywa.

“Abantu babaleka batshiya amakhekhe kukanti labo ababehamba ngezimota bapontshiselwa amavili, amafasiteli abulawa bathi beqeda lapho bacela ezinyaweni,” kubika uMnu Ndlovu.

Intatheli ibuye yaxhumana loMnumzana Velani Ndlela ochaze ukuba udaba lokuvalwa komtshado liqiniso njalo abantu behluleka ukudla inyama ngenxa yeqembu labafana laba.

“Abantu babelibele bejabula emtshadweni cala celeni, kwathutsha okungabafana okulomona kwafika kwaqala impi kungaziwa ukuthi kubangwani. Akula owadonsa omunye wonke umuntu wazibonela ukuthi sokukubi wacela ezinyaweni edinga lapho angacatsha khona.

“Umakoti asibonanga ukuthi wasukuma sikhathi bani ngoba bahle baqala ngokuhaza yena lomyeni wakhe inhlabathi umtshado wahle wavalwa. Okwenziwa ngabafana laba kubi kakhulu, kumele babanjwe baxolise,” kuchaza uMnu Ndlela

Iphephandaba likazulu lixhumane lenduna uDumisani Ndondo oveze ukuba udaba olunjalo lwafika endlebeni zakhe.

“Ngafonelwa sekukubi emtshadweni lami ngasengifonela amapholisa ukuze ayelondoloza ukuthula lakanye bahamba lami ngathi ngifika ngathola umsindo usuthe cosololo abantu sebechithekile.

“Okwakhathesi sisadingisisa ukuba izigilamkhuba lezi ngezangaphi ukuze zijeziswe,” kubika induna uNdondo

Imizamo yokuxhumana lalabo ababetshada kanye lababetshadisa yehlule ngoba incingo bezingangeni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds