uMthunywa
YiNtatheli kaMthunywa
UMDLALI wenguqu wakuleli uKudakwashe Mahachi useveze ukuba ulomlandu omkhulu wokuthi adlale kuhle kuqembu lakhe elitsha eleMedeama, elabazintshantshu zeligi yeGhana ngesizini edluleyo.
UMahachi, oleminyaka engu-29 yokuzalwa uvumelane leqembu leMedeama kumaviki amabili adluleyo lapho azadlala khona okomnyaka owodwa.
Lokhu kuza ngemva kokuba umdlalo lo eqede umnyaka engadlali, esuka kuSuperSport United kulandela ukwetheswa icala lokuhlukumeza indodana yakhe.
Okwakhathesi, useqalisile ukulolonga leMedeama njalo uphume ebulenjini beGhana Football esithi ulomthwalo wokuthi asebenze gadalala ukuze athole ukukhethwa eqenjini.
“Ngilomthwalo ongekho lula ngoba leli liqembu elanqoba iligi ngesizini edluleyo. Njengabadlali abatsha eqenjini kumele sisebenze, silandele okwenziwa ngomnyaka odluleyo,” kutsho umdlalo lo owake wadlalela i-Orlando Pirates, Golden Arrows leMamelodi Sundowns eSouth Africa.
Kubikwa umdlali lo ufike wachelesa kuqembu leMedeama lapho ababaze ukuthi ujabuliswa yindlela abalolonga ngayo.
IMedeama okwamanje ilungiselela ukuyancintisa kumidlalo yeCaf Champions League lapho ezadlala khona leqembu leRemo Stars eyeNigeria.
