Uncategorized

Umthimba wokudla kwesintu e-Amagugu Heritage Centre

28 Mar, 2019 - 00:03 0 Views
Umthimba wokudla kwesintu e-Amagugu Heritage Centre

uMthunywa

Bongani Ndlovu

ASEQALISILE amalungiselelo omcimbi wokudla kwesintu e-Amagugu Cultural Centre lapho okuyabe kubukiswa njalo kulondolozwa ukudla kwesintu ngoba uzulu engasazigqaji ngakho.

Ekhuluma lentatheli kaMthunywa uMnumzana Butholezwe Nyathi ongomunye wabahleli bomcimbi lo, uthe lumcimbi uzaqala mhlaka 1 kusiya ku 6 Mabasa njalo ngumcimbi wokubukisa lokulondoloza ukudla kwesintu.

“Lonyaka ngumcimbi wethu wesithathu, sifuna ukuthi sibukise ukudla kwethu kwesintu ngoba abantu besintwini abasaziqhenyi ngokudla kwabo kwesintu njalo lumsebenzi uzasiza ukulondoloza ukudla kwesintu.

“Ukudla lokhu akuphanjaniswa yikuguquka komumo womkhathi ngoba nanko umumbu utshile emasimini ngokuswelakala kwezulu kodwa umumbu ayisiwo wodwa ukudla kwesintu ngoba kukhona umfahlwa, umcaba lenkobe,” kuchaza uMnu Nyathi.

Ugcizelele wathi lumcimbi uyabe uqakathekile ngoba usebenza ukuphakamisa omama njalo uphinda ufundise intsha ukupheka lokuqakatheka kokudla kwesintu ukuze ulwazi lungalahleki.

“Sinxusa abantu ukuthi babuye ngobunengi babo bezoncedisa ukuphakamisa omama ngoba yibo ababiziweyo ukuzopheka njalo lokufundisa intsha indlela zesintwini zokupheka ukudla kwesintu,” kuveza uMnu Nyathi.

Uqhubekele phambili wathi lumcimbi uhlose ukufundisa abantu bakomthwakazi ukuthi ukudla kwesintu lakho kulemali.

“Lumcimbi uhlose ukufundisa abantu bakoMthwakazi ukuthi ukudla kwesintu kuyenelisa ukuletha inzuzo emphakathini ngakho simeme amabhizimusi amakhulu asebenza ngokudla kwesintu afana laboArenel abathengisa amahewu ayikudla kwesintu kanye lamanye amabhizimusi,” kuveza uMnu Nyathi.

Uphethe ngokuthi umcimbi lo uvulelwe wonke umuntu njalo bakhangelele ukuthi labantwana bezikolo baze ngobunengi babo ngoba beyibo ikusasa njalo kukhona abaculi abazabe bekhona abakoBulawayo . Mhlaka 6 kuzobe kulomcimbi wokutshisa inyama lokugida emadwaleni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds