uMthunywa
Joel Ndlovu
ABALIMI sebekhuthazwe ukuthi baqakathekise ukuthatha umshuwalensi wezilimo zabo ukuze zivikeleke nxa kungenzeka kwehle inhlekelele emapulazini abo loba ngasiphi isikhathi.
Ukuthatha umshuwalensi kuyaphathisa umlimi ukuthi angehlelwa yingozi athole imali yokuqhubekela phambili ngebhizimusi yakhe.
Ekhuluma lentatheli kaMthunywa uMnumzana Sheunopa Dube oyingcitshi kwezokulima lokufuya esabelweni seMatabeleland North uthe umshuwalensi wezilimo uvikela abalimi ukuthi bangalahlekelwa yinzuzo yabo.
“Umshuwalensi wezilimo uqakathekile kakhulu njalo kumele umlimi awuthathe ukwenzela ukuthi izilimo zingatshabalaliswa ngumlilo wendle athole imali yokuqhubekela phambili ngebhizimusi yakhe kulokuthi icine isifa ngokuswela imali yokuthenga impahla edingakalayo.
“Isikhathi esingena kiso sivame ngokuba lemlilo yendle ecina itshabalalise impahla yonke epulazini. Umlimi nxa ethethe umshuwalensi kungenzakala kube lengozi yomlilo, kadingi kuqala kutsha ukuthi ahlanganise imali yokuqalisa ibhizimusi kodwa uyayinikwa ngumshuwalensi,” kutsho uMnu Dube.
Uqhubekele phambili esithi umshuwalensi kawuvikeli kungozi zokutsha kuphela.
“Ukutsha ayisikho kodwa okubulala izilimo, kumele abalimi bangavikela izifuyo zabo njalo kunhlekelele zemvelo ezifana lokutshaywa kwezilimo ngumbane, ukutsha kwezilimo zibulawa lizulu, kanye lokunye.
“Sikhuthaza ukuthi abalimi bavakatshele amahofisi aseduzane labo athathisa umshuwalensi bayozwisisa kabanzi ngemihlobo abangayithatha ukuze bavikele ingozi yokucina belahlekelwa yinzuzo yabo,” kutsho uMnu Dube.
Uphethe ngokuthi abalimi kumele bakwazi njalo ukuthi umshuwalensi wezilimo kawugoqeli impahla yonke yepulazini, kungakho umlimi kumele athathe omunye oqondane lezakhiwo, izimota lokunye.
