uMthunywa
Thokozile Mbedzi
KULENDODA yeMatsheumhlophe koBulawayo okubikwa ithe kusisebenzi sayo esileminyaka engu-16 ifuna ukudla yathi ikuqhutshelwa yasiphendukela yasidlwengula.
Umetheswacala uJabulani Siamusawu oleminyaka engu-35 kubikwa mhlaka 15 Mpandula wayesele endlini lomamangala owayewatsha wathi kamlungisele ukudla kwemini.
Kubikwa umamangala wapheka wamnika kodwa wathi kasuthanga ufuna okunye uthe esesiyamnika wafika wamfuqela embhedeni wambamba iganyavu kanye.
Kubikwa umamangala wabikela izihlobo zakhe ngesenzo somqhatshi wakhe njalo wachaza ukuthi lokhu kakuqalisi, wake wamhlukuluza okwenza bayabikela amapholisa.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo.
“Sibophe indoda eleminyaka engu-35 esolwa ngecala lokuhlukuluza emacansini intombazana eleminyaka engu-16 ebisebenza. Intombazana le ichaze ukuba lokhu bekungasi kokuqala.
Abednico Ncube
“Amacala okudlwengulwa kwabantwana ngabantu abaziwayo asemanengi njalo lokhu sekusikhathaza njengamapholisa.
“Sixwayisa uzulu ukuba abazali kumele babone ukuba labo abahlala labantwababo ngabantu abathembekileyo njalo abalobuntu,” kuphetha uInsp Ncube.
