Umqando ungawathintitha amathole esibayeni

Bhekimpilo Tshalibe

INHLANGANISO ye-Livestock Production isikhuthaze wonke umlimi ofuye inkomo zochago ukuba ananzelele njalo avikele  amathole emqandweni, ngokwenza izibaya zawo zikhudumale. Lokhu kuzawavikela emqandweni njalo lesibaya sikhule.

UMnumzana Cosmas Muzunde onguDairy Officer kunhlanganiso le, esabelweni seMatabeleland North uthe kuqakathekile ukuthi umlimi abone ukuthi amathole asendaweni ezikhudumalayo njalo awangenwa ngumqando ngoba angangenwa ngumqando ayahlaselwa yi-pneumonia kumbe acine esifa.

“Ngalesi isikhathi somqando ngithanda ukukhuthaza abalimi ukuba bananzelele amathole angangenwa ngumqando, ngoba angangenwa ngumqando ahlaselwa yisihlabo acine esifa,” kuchasisa uMnu Muzunde.

Uqhubekele phambili esithi ukuze amathole akhudumale kumele athole uchago olungaba ngange-2 litres olukhudumalayo, kabili ngelanga. Uthe okunye okubalulekileyo yikwendlala utshani ezibayeni zamathole ukuze akhudumale.

“Abalimi kumele bendlalele amathole utshani ukuze akhudumale angangenwa ngumqando ovela phansi. Kumele anikwe futhi uchago olungaba yi-2 litres olukhudumalayo kabili ngelanga.

“Ezibayeni zamathole kukhangelelwe ukuthi kube lemiduli evalela umoya lomqando, kukanti izibaya kumele zifulelwe,” kuphetha uMnu Muzunde.