Innocent Kurira
UMGIJIMI ohamba phambili kumabanga amade, u-Isaac Mpofu, usekhangelele ukuphumelela kuWorld Athletics (WA) Championships, njengoba esewaqalile amalungiselelo alumncintiswano ozaqhutshwa ekupheleni kwalumnyaka.
Kumalungiselelo akhe, uMpofu ungene kumijaho yeBulawayo Athletics Board (Bab) Track and Field Championships eqhutshwe ngempelaviki.
UMpofu ubona imijaho le iyinxenye yokulolonga kakuhle, ehlose njalo eminye imincintiswano ezandulela oweWorld Championships. Njengoba esehlela amanyathelo akhe, ugxile kakhulu kuma-World Athletics Championships e-Tokyo, eJapan mhlaka 13 kusiya ku-21 Mpandula lonyaka.
UMpofu wancintisa emjahweni eyeBab, owe1 500m kunye le5 000m. Ku-1500m, uthethe indawo yokuqala ngesikhathi se-4.5.78 seconds. Utshaye intambo ku-5 000m nge-14.56 seconds.
“Umqhudelwano lo uyingxenye ebalulekileyo kumalungiselelo ami wokuya kuWorld Championships. “Kumele ngihlale ngiqinile, ngilengqondo ezibukhali njengoba imincintiswano emikhulu phakathi kwalumnyaka. Kubalulekile ukuba kubanga lokuncintisa elinje nge-World Championships, ama-Olympics, ama-African Games lama-Senior Championships. Wonke umuntu ufuna ukufika kulezi isigaba,” kutsho uMpofu.
Ngomnyaka odluleyo uMpofu wenza kuhle emncintiswaneni wama-Olympics lapho aqeda ekunombolo etshumi lasitshiya galolunye. Wathola imendulo yethusi ekhaya, evela gijima kuma-African Games edolobheni le-Accra, eGhana. Wayeqede umango ngehola elilodwa lemizuzu emihlanu lemzuzwana enyi-58.
Kumjaho we-Bab oqhutshwe ngeviki edluleyo, uTulange Mudenda ovela eBinga utshaye intambo yomango we-5 000m ngemizuzu elitshumi lasitshiya galombili lemzuzwana elitshumi lesikhombisa.
Umncintiswano lo uqhutshwe kanye kanye lezifundo ze-Coach Education and Certification Systems (CECS) le-Technical Officials Education and Certification System (TOECS).
Abanye abenza kuhle emncintiswaneni nguThokozile Kunene owaqeda i200m, kuhlandla lamankazana, ngemzuzwana ye-30.23 seconds, elandelwea nguLuda Dube nge-32.19 seconds.
Kuhlandla labomama ku-200m, kunqobe uRutendo Vushe nge-25.55 seconds. UNomazulu Ndlovu loNompumelelo Gadluma baphutshe umango belandela kunombolo yesibili leyesithathu.
UPriscilla Bhuda unqobe ku-100m hurdles nge- 20.81 seconds, elandelwa nguRuvarashe Marufu (22.38 seconds) loHayley Dube (23.87 seconds).
