Ellina Mhlanga eseParis, France
AMATHEMBA esizwe kumidlalo yama-Olympics akuRutendo Nyahora lo-Isaac Mpofu abagijima kulimpelaviki.
Umqeqetshi wezokugijima uBenson Chauke uthe bobabili sebelolonge kakuhle lapha eParis njalo balindele ukuncintisela imendulo kumijaho yeMarathon. Bobabili bahlangane labanye abamele iZimbabwe ngempelaviki edluleyo.
“Sifike kuhle, sathola lonke usizo kunye lempahla ebalulekileyo. Okuseleyo yikuthi silolonge, sijwayele isimo lomumo womkhathi wendawo. Okunengi okuphathelane lokulolonga sakwenza ekhaya,” kutsho uChauke.
UChauke usebenze loMpofu kumalungiselelo wokuza eParis kusukela ngoZibandlela. UNyahora ubezilungiselela ngaphansi komqeqetshi uLindsey Parry eSouth Africa lapho ahlala khona.
UMpofu loNyahora bahlangane eDoha, belubhekise eParis.
“URutendo ubelolonga eseSouth Africa. Besixhumana phakathi kwamalungiselelo omncintiswano. Ubesenza kuhle lomqeqetshi wakhe. Sizalolonga laye lapha.
“Akula okunengi esizakwenza kodwa sizaqina ngokujwayeza imizimba yabo. Kasethuki lutho loba kulabagijimi abesatshwayo u-Eliud Kipchoge oweKenya loKenenisa Bekele owe-Ethiopia. Ngelanga lomncintiswano kungenzakala loba yini. Amathuba empumelelo asemuntwini wonke. Sizimisele ukunqoba, sithole imendulo ngoba yikho esikulande lapha,” kutsho uChauke.
Kumalungiselelo wokuya eParis, uMpofu wagijima kumjaho weBoston Marathon eMelika waqeda ekunombolo yesithupha ngemva kwe-2 hours 8 minutes 17 seconds.
Wathola imendulo yethusi kumncintiswano wama-African Games, edolobheni le-Accra Ghana ngoMbimbitho.
Phambilini wayethole igolide kuFNB Kazungula Bridge Marathon, ngoNhlolanja.
Ubuye njalo wancintisa kuTanganda Half Marathon ngoNhlangula lapho aqeda khona ekunombolo yesithathu.
Waphatheka ku-Econet Victoria Falls Half Marathona wathola igolide.
Uyachinsa ukuncintisa kuma-Olympics. UNyahora uncintisa okwesibili ngemva kokuqala ngo2016 eRio.
