uMthunywa
YiNtatheli kaMthunywa
KULAMANINA amabili esigabeni seNyashanu eBuhera afileyo ensukwini ezisanda kwedlula kulandela ukuhlatshwa amajekiseni angu-32 omthandazo ngomunye umphurofethi okubikwa wayevela eKadoma.
Kubikwa ngemva kokwenza lokhu umphurofethi lo wahle wanyamalala.
Amapholisa esabelweni seManicaland afakaze ngokufa kwamanina la amabili okubikwa ahlatshwa amajekiseni angu-32 sikhathi sinye, bacatshwa okwabangela ukuthi basale bevuza igazi andubana bafe bephuma igazi emlonyeni lemakhaleni.
Ababili laba kubikwa babeyedinga uncedo kumphurofethi lo okubikwa wayevakatshele unina khonale eBuhera.
UPeneil Zvinowanda (69) kanye loEllen Marime (57) kubikwa bobabili bafa besanda kuhlatshwa amajekiseni mhlaka 24 lo 25 Mpalakazi eBuhera.
Isikhulumi samapholisa eManicaland uInspector Tavhiringwa Kakohwa uthe amapholisa adinga uKudakwashe Ziwange (33) osolwa ngecala lokubangela ukufa kwababili laba.
Uzulu ongabe elolwazi lokuthi ungaphi ukhuthazwa ukuthi abikele amapholisa aseduzane laye.
Umetheswacala wacina ukubonakala ehlala ku 74 Tsoka, eRimuka eKadoma.
Kuzwakale ukuthi umphurofethi lo wavakatshela unina lapho acina ehlaba amanina la amajekiseni alomuthi ongakaziwa.
Kubikwa uZvinowanda nguye owaqala ukuya kumphurofethi lo edinga uncedo ngoba ekhathazwa liqolo okweminyaka efika engu-20.
UZvinowanda kubikwa wahlatshwa amajekiseni angu-17 alomuthi wesintu ongakaziwa wasuka kule indawo esegula kakhulu.
“Umnewabo uTawanda nguye owamthola elele eceleni komgwaqo wahamba laye ngekhaya lapho afika wafela khona,” kutsho amapholisa.
Isidumbu sakhe kubikwa sasilezilonda emadolweni, endololwaneni njalo wayephuma igazi lemlonyeni lasemakhaleni.
Isidumbu sasiwa emotsha yeMurambinda Mission Hospital ukuze siyohlolwa.
Mhlaka 25 Mpalakazi, kubikwa umphurofethi lo wavakatshelwa nguMarime yena owayefuna ukwelatshwa inyawo ezasezimhluphe okweminyaka emihlanu. UMarime waphelekezelwa ngumzukulu wakhe, njalo kubikwa yena wahlatshwa amajekiseni angu-15 alomuthi wesintu ofanayo.
Umkhuhlane wakhe waqina ngamandla okwabangela ukuthi afe.
Isidumbu sakhe laso sahanjiswa emotsha seMurambinda Mission ukuze siyohlolwa laye wayesopha ngomlomo lenyawo.
Indaba lezi zombili zamangalwa emapholiseni okuyikho okwenza umphurofethi lo anyamalale endaweni le.
Kumaviki amabili adluleyo sokufe abantu abane ngemva kokuphiwa imithandazo ngabaphurofethi abatshiyeneyo.
Kulamanina njalo akoBulawayo afa ngemva kokunathiswa umthandazo ngomunye umphurofethi wakoBulawayo ohlala elokitshini leCowdray Park.
