
Ethel Ncube
KULOMPHUROFETHI webandla lePostoli eZhombe odlwengule umntwana oleminyaka engu-16 yokuzalwa phambi kwabanawakhe abathathu ngoba ehluleke ukubhadala imali yomkhuleko awenzelwe ngoNkwenkwezi.
Umphurofethi lo, uSimon Madwala wakhulekela umamangala kodwa uthe esekhulekelwe waswela imali yokubhadala wamlanda ngakibo lapho afika wamdlwengula abazali bakhe bengekho.
Kuzwakale ukuthi umphurofethi lo, ongumetheswacala wahamba komamangala emini wafika wambiza ukuba ayemthandazela ngoba wayeke ahambe enkozweni le, uthe esethandazelwe wathi ufuna ukubhadalwa kodwa umamangala wathi kalamali.
Umetheswacala wabuye wabuyela komamangala ntambama esazi ukuba abazali kabakho wakhupha ingqamu wamethusela andubana amdlwengule kanye phambi kwabanawakhe abathathu abaleminyaka ephakathi kwengu-4 le 10.
Umamangala wagijima wayabikela omakhelwane abahle bamusa emapholiseni.
Iphephandaba likazulu lixhumane lesikhulumi samapholisa eMidlands uInspector Emmanuel Mahoko oveze ukuba indaba enjalo yafika kibo.
“Indaba yokudlwengulwa komntwana yafika ezandleni zamapholisa. Umphurofethi lo usesezandleni zamapholisa ngecala leli.
“Uzulu kavikele abantwana, bangasali bodwa njalo nxa besiya ezinkozweni abahambe lomuntu omdala,” kuphetha uInsp Mahoko.