uMthunywa
Ethel Ncube
KULOMPHATHISIKOLO weMluindi eBinga osele ethoba amanxeba ngemva kokutshaywa ngomunye njalo umphathisikolo kubangwa isigodokhaya.
Insindabaphenduli le yenzakale ngeviki ephelileyo lapho uMnumzana Michael Sevenzai ongumphathisikolo esikolo semfundo yaphezulu eMluindi atshaye uMnumzana Tawurai Mapolisa ongumphathisikolo kumfundo yaphansi esikolo esifanayo kubangwa isigodokhaya, uMthunywa ukuzwile lokhu.
Ekhuluma lentatheli omunye wezakhamizi zakule indawo uMnumzana Mudenda uveze ukuba uMnu Sevenzai abasamfuni, uluhlupho.
“UMnu Sevenzai uludubo, thina asisamfuni, sacela ugatsha lwezemfundo ukuthi lusincede kodwa luzithulele.
Umphathisikolo lo kahloniphi amasiko ethu njalo uyadelela inkokheli zesigaba, abazemfundo sabatshela bazithulela kodwa sezizinengi izigigaba zakhe.
“Umphathi lo uluhlupho, sesikhulume saze sadinwa. Abantu bazalimuka sekulesidumbu phansi esetshaye wabulala umuntu, ngikhuluma nje kakukabi lenyanga uke wahamba enduneni wafika wayithethisa efuna ukuyitshaya kwalamula abantu, khathesi nanku setshaye umphathisikolo ngesitulo wamqamula ingalo.
Kubizwa kuthiweni?” kubika uMnu Mudenda.
Uqhubekele phambili eveza ukuba umphathisikolo lo uvele ulomlomo.
“Wathola lo omunye umphathi wesikolo semfundo yaphansi ezidlela amabele wafika waxokozela basebemxotsha abantu yena walanda uMnu Mapolisa wamudla ngempama uthe esabona inkanyezi wathatha isitulo wamuthi go engalweni yena wadla phansi, ngikhuluma nje umphathi lo usesibhedlela seMpilo koBulawayo.
Asazi ukuthi ubuntu wabusa ngaphi lubaba ngoba lababalisi uyabahlukumeza.
“Sisambekela isikhupha, kuseBinga lapha, akudlalelwa.
Uzabona kwelinye ilanga sizamthumela indwangu iyexoxisana laye imkhuze ngezenzo zakhe ukuze achume ahloniphe, akusensuku zatshwala ingamqoqodelanga endlini yakhe.
Thina usesehlule, inyamazana yiyo ezamisana laye,” kubika uMnu Mudenda.
UMthunywa uxhumane lenduna yakule indawo uDobola oveze ukuba udaba lokulwa kwabaphathi lufikile endlebeni zakhe.
“Lami ngizwe bekhuluma besithi umphathisikolo wesikolo semfundo yaphezulu utshaye omunye ngempama langesitulo, angazi ukuthi kuhamba njani.
Mina wake wangithethisa efuna ukungitshaya ngahambisa udaba kubakhulu bezemfundo bathi bayabuya kodwa abasabuyanga angazi ukuthi kuhamba njani.
Lumuntu uyahlupha, sithwele nzima, kabazame icebo ngaye,” kuphetha induna uDobola.
