uMthunywa
Nkosilathi Sibanda
UMSEKELI weChicken Inn omkhulu uMcCloud “Moyes” Moyo uthe nxa iHighlanders icabanga ukuthi izanatha itiye ngemva komdlalo wamaqembu womabili, ayikhohlwe.
AmaGameCocks anxusa iBosso kumdlalo wesikhombisa weligi yeCastle Lager enkundleni yeBarbourfields ngoMgqibelo.
Ukunqoba kweHighlanders ngempelaviki angeke kwenzeke ngokutsho kuka “Moyes”.
“Sizayibamba itshisa, sizavala igedi, sihleke sibenze izithutha egumeni labo leBarbourfields….,” nguMoyo lo.
Zombili zingena kulumdlalo nje abalandeli beHighlanders bekhulekela ukuthi eyabo ithole imiklomelo yonke, nanko ayikanqobi ngitsho ithimu.
IChicken Inn isiphendukile kumncintiswano wengqwele zeligi ngokuqakama kulogu ngemva kokudliwa kumidlalo emibili ilandelana.
Abafana bakaJoey Antipas laba baqeda ukunqoba iManica Diamonds 2-0. IHighlanders iphethe iphefuzela kusehlula ukubhoboza umambule idlala leHwange.
Nxa kungenzeka ngoMgqibelo iChicken Inn inqobe, kuthi iFC Platinum, iCaps United leHwange zidliwe, kutsho ukuba uAntipas uzabe esekhokhela ngempelaviki.
Ukunqotshwa kweHighlanders kungadala okukhulu.
Okwamanje izimbamgodi zeFC Platinum zikhokhela ilogu ngemiklomelo engu-14, ilandelwa yiCaps United leHwange ezilingana ngemiklomelo engu-13. Abafana benkukhu bathe khoxo kunombolo yesine ngemiklomelo engu-12. IBosso yona ihlezi phansi kunombolo yesi-16.
Umsekeli weChicken Inn uqhubeke wathi: “Umoya wami uvuma into eyodwa. IChicken Inn izanqoba njalo iHighlanders ayisoke ivukele kithi,” kutsho lumsekeli.
“Sibanxuse egumeni labo. Sizabatopola kuphela. Bazobuya kithi befuthelwa njengoba bengakanqobi lowodwa umdlalo kuligi. Bazafuna ukutshaya amabhola kodwa sibophile. Ngibathembile abadlali beChicken Inn. Abakaze bangephule umoya.”
Okubalulekileyo kulumdlalo yikuthi amaqembu womabili akholisise abantu. Kumidlalo edluleyo, ababukeli bebephuma kulumdlalo bedanile.
Umqeqetshi osebunzimeni nguMadinda Ndlovu ngoba ujahe ukunqoba ukuze umsebenzi ungapheli.
Iphephandaba likazulu libuze omunye umsekeli weBosso uKenias Ndebele ukuthi yiphi impumela engabajabulisa kulumdlalo wabo leChicken Inn, uthe: “Okuqakathekileyo yikuthi singadliwa, ukuphuma lomklomelo kungasijabulisa kakhulu kodwa nxa belahla, kufanele sinqobe. Kungajabulisa shuwa.”
