Uncategorized

UMongameli welizwe wethula amazwi enduduzo koShana…Izafihlwa ngoMgqibelo induna

16 May, 2024 - 00:05 0 Views
UMongameli welizwe wethula amazwi enduduzo koShana…Izafihlwa ngoMgqibelo induna uKhomuredi Emmerson Dambudzo Mnangagwa

uMthunywa

YiNtatheli kaMthunywa

UMONGAMELI welizwe uMnangagwa usethumele amazwi enduduzo kumuli yenduna uShana III wesabelweni seMatabeleland North ezafihlwa eJambezi ngoMgqibelo emzini wayo.

Induna uShana igama layo lokuzalwa nguZondani Jonah Neluswi, wazalwa mhlaka 1 Ntulikazi ngomnyaka ka-1940, kukanti ukhotheme ngemva kokugula isikhathi eside esibhedlela seMater Dei koBulawayo eleminyaka engu-83.

Kukhangelelwe ukuthi umzimba uzathwalwa usuka koBulawayo uhanjiswe eHwange lapho ozagcinwa khona kuze kufike usuku lokufihlwa kwakhe ngoMgqibelo.

UMongameli welizwe ubuye waveza ukuthi uHulumende uzancedisa kumngcwabo wenduna uShana.

Esethula amazwi enduduzo emulini yakoShana uMongameli welizwe uthe ube lokudana okukhulu esamukela umbiko wokwedlula kwenkokheli le yomdabu.

Uthe induna uShana ime njengomuntu ophakemeyo njalo umsebenzi wayo wadlulela ngale kobukhosi bayo yabuye yaba lomsebenzi omkhulu kuKhansili yezinduna elizweni.

“KuSenethi induna uShana yenza konke okusemandleni ayo ekuqinisekiseni ukulingana okufaneleyo kwezomthetho welizweni kanye lobuntu bethu njengabansundu.

“Sizamkhumbula kakhulu ngokuzimisela langemisebenzi yakhe ikakhulu kuHulumende. Kungakho-ke mina lemuli yami sithanda ukwethula amazwi enduduzo kumuli yakoShana sithi abaduduzeke.

“UHulumende uthanda ukwelula isandla ancedise kundleko zomngcwabo,” kulandisa uMongameli welizwe.

NgoLwesibili imuli yakoShana yethule umbiko wokuthi isidumbu sesisusiwe emotsha yesibhedlela seMater Dei Hospital sahanjiswa emotsha yeHwange Colliery.

Mater Dei hospital

Imuli yakoShana ithi ilahlekelwe ngubaba obengumholi, obehola abantu ngobuqotho.

Indunankulu yeKhansili yezinduna uMtshane Khumalo uchaze imbali kaShana III ngamafitshane.

“Induna uShana III ubeluphawu lobukhokheli bomdabu elizweni. Induna uShana yenza izifundo zayo zaphansi eJambezi Primary School, wasesiya qedisa uStandard 6 eSt Mary’s, ngemva kwalokho wahamba wayasebenza enkampanini ye-Hwange Colliery engu-clerk ngomnyaka ka-1963.

“Ngomnyaka ka1997 waba ngu-community service officer. Wagcotshwa ukuba yinduna ngomnyaka ka1984 kwaze kwafika isikhathi sokukhothama kwayo. Wabuya njalo waba lilunga lePhalamende kusukela ngomnyaka ka-2005 kusiya ku-2008, wabuya waba nguSenetha kusukela ngo-2008 kusiya ku-2012.

“Ngomnyaka ka-2013 kusiya ku-2023 ubengumngcinisihlalo we-Provincial Assembly eMatabeleland North njalo elilunga le-Copac. UShana utshiye unkosikazi amthatha ngomnyaka ka1963, labantwana abayisitshiyagalombili, abazukulu abangamatshumi amabili lantathu lezizukulwane ezintathu,” kuphetha induna uKhumalo.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds