uMthunywa
YiNtatheli kaMthunywa
KULOMNTWANA oleminyaka yokuzalwa engu-5 esiqintini seMadlambuzi ofe ngemva kokuthathwa ngumfula ngeviki ephelileyo.
Lokhu kwenzakale mhlaka 16 Mbimbitho. Kubikwa umntwana lo ubevela esikolo eHingwe Primary School lomngane wakhe oleminyaka yokuzalwa engu-7 sokulihola lika 1700 ntambama ngesikhathi kusenzakala umonakala lo.
Bathe befika emfuleni uMajasi bawuthola ugeleza.
Laba bobabili bangena emfuleni bethi bachaphe baye ngekhaya kulapho-ke oleminyaka engu-5 athathwa khona ngumfula.
Omunye wenelisa ukuchapha wagijimela ekhaya ukuyabiza abadala.
Ekufikeni kwabo emfuleni bamthola bamkhipha emanzini kodwa esedlule emhlabeni.
Ekhuluma lentatheli kaMthunywa oyisikhulumi samapholisa eGwanda uInspector Loveness Mangena uthe indaba le yafika emapholiseni,
“Amapholisa akhuthaza izakhamizi ukuthi abantwana bonke abancane baphelekezelwe nxa besiya ezikolo njalo bengachaphi imifula egelezayo kungela muntu omdala obakhangeleyo,” kutsho uInsp Loveness Mangena egqiba inkulumo yakhe.
