uMthunywa
Ethel Ncube
ZISELE zitshwaqe imzimba izakhamizi zeTshefu Tshefu eTsholotsho kulandela ukutholakala komntwana oleminyaka eyisithupha ezibophele ngakibo, andubana kuvele ukuba wadlwengulwa wasebulawa.
Indabamlonyeni le yenzakale ngeviki ephelileyo lapho uLethukuthula Tshuma obeleminyaka engu-6 yokuzalwa etholakale ezibophele.
Esinye isakhamuzi esikhulume loMthunywa uNkosazana Senziwe Ndlovu uveze ukuba kukhona okutshaya amanzi okungasinhlanzi.
“Umntwana lo ubevakatshile eselezinyanga ehlala logogo ekhaya. Ugogo wayesendlini ehulula umumbu encediswa ngomunye umakhelwane.Umakhelwane lo uthe ephuma esiyakhangela umumbu wathola umntwana esezibophele.
“Isidumbu sathwalwa sayahlolwa umntwana watholakala ukuba wadlwengulwa kanengi njalo wabotshelwa okwadala ukuba edlule emhlabeni.
“Imbuzo esikhona yikuthi wadlwengulelwa ngaphi njalo wabotshelwa njani ngakibo,” kulandisa uNkszn Ndlovu. “Sikhathazekile ukuthi ngubani owenza into eyesabeka kangaka. Lathi sinje siphathekile njengezakhamizi ukudinga udletshana lokuthi ngubani owenza lokhu.
“Ugogo womntwana uyazidla izibindi ukuthi umzukulu wakhe wadliwa yini. Njengezakhamizi sizwa ubuhlungu njalo asisakwazi ukuthi abantwana abangamankazana sibagcine njani nanko omunye ubulewe elogogo edlala phandle,” kubika uNkszn Ndlovu.
Intatheli ixhumane lesikhulumi samapholisa esabelweni seMatabeleland North uInspector Glory Banda ovumileyo ukuthi kulomntwana (6) otholakale ezibophele. “Sichwayisisa udaba lomntwana (6) otholakale ezibophele. Kukhona okunuka santungwana esingeke sikuchaze khathesi ngoba kungaphambanisa ukudingisisa kwethu,” kuphetha uInsp Banda.
