uMthunywa
Nkosilathi Sibanda
INTSHANTSHU zokugijima imango emide zikhangelelwe ukuthi zidibane kulimpelaviki kumncintiswano we-ZRP Commisioner General’s 21KM elokitshini leNkulumane.
Umjaho lo oqoqwe ngamapholisa esizwe uza koBulawayo okwakuqala lokhe wasungulwa.
Abagijimi abangu-500 bakhangelelwe ukuthi bagcwale imigwaqo yelokitshini leNkulumane bebanga isicoco esikhulu.
Abazanqoba kulumjaho bazathola i$30 000.
Inhlanganiso yeBulawayo Athletics Board (Bab) ithe kuzancintiswa kulandelwa izinqumo zokwenqabela iCovid-19 ngakho akusoke kuvunyelwe abantu abazabukela.
Loba umncintiswano omkhulu uzakuba yi21KM, bakhona abazancintisa imango ye- 10km le 5km.
Umgcinisihlalo weBulawayo Athletics Board uWatson Madanyika ngoLwesibili wazise ukuba sebelungiselele baphelela ukwamukela abagijimi.
“Ilanga ebesililindele selisondele,” kutsho uMadanyika.
Umncintiswano lo kwakumele uqhutshwe kumaviki amabili adluleyo kodwa silokuthaba ukuthi khathesi konke sekuqoqiwe.
“Inani labagijimi lingafika ku-500 nanko phela bakhona abalokhe bebhalisa. Kuzaqakatheka ukuqonqosela ukuthi senqabele iCovid-19 emdlalweni wethu.”
Kusenjalo, omunye wabancintisi uDeliverance Ncube ogijimela iqembu leSizinda Arrows utshele uMthunywa ukuba useyicentile indlela.
“Mina labanye bami sesilungiselele ukunqoba. Leli lithuba lethu lokuthi sithathe isicoco njengabagijimi bakoBulawayo.”
— Twitter @NkosieLegend
