uMthunywa
Umamazala wazithengela imota ngemali yakhe yepentsheni esenzela ukuthi athole ukuhamba esibhedlela lula.
Kwasokusifa enye ifasitela kumota le, umamazala wacela umkhwenyana ukuthi ayemlungisisela ifasitela umkhwenyana wavumela phezulu.
Kwaba yikho ukucina ukubona imota yakhe kanye lomkhwenyana.
Sokwedlule umnyaka owodwa umkhwenyana engakaphenduki lemota kamamazala.
Khathesi sokwavulwa icala lokutshontsha njalo amapholisa ayamdinga lumkhwenyana ngamehlo abomvu.
Ugogo uChristina Swambo (62) weTsakane Ekurhuleni kweleSouth Africa ohamba ngezinduku (crutches) kasenelisi ukuyafika lula esibhedlela.
Uthi umkhwenyana wakhe wathatha imota mhlaka 2 Nhlolanja nyakenye.
“Ngamnika iR850 yokuthi ayelungisisa ifasitela.
Uthe ngaleso isikhathi indodana yakhe uLebogang Swambo yayisemsebenzini, kungakho wethemba umkhwenyana wakhe yiloba engasekho ndawonye lendodakazi yakhe kodwa wamtshengisa ukuba akathembekanga.
“Weza ezotshiya umntanakhe okungumzukulu wami owayemvakatshele eDobsonville eSoweto. Beza behamba ngetekisi. Ngasengimthemba ngimthuma lemota yami kanti angibuzanga elangeni.”
ULebogang uthe unina wabikela amapholisa wona athinta umsolwa.
Bathi umsolwa wathi uzakusa imota kwesinye isitolo esiseDobsonville.
“Ngathuma abantu ukuthi bayethatha imota bathi befika lapho abayificanga.
“Ngiyayifuna imota yami, ifile kumbe isaphilile,” kutsho uGogo.
Ugogo wathatha umhlalaphansi esitolo semithi lapho ayesesebenze khona okweminyaka engu-26, wasethenga imota ngengxenye yephentsheni yakhe.
ULebogang uthe umkhwenyana akalethe imota yesalukazi ngoba sikhubekile kakhulu.
“Ukugada amatekisi kuyamlimaza umama.”
Kwavulwa icala lokweba emapholiseni njalo umsolwa uyadingwa.
