uMthunywa
Nkosilathi Sibanda
UMQEQETSHI weTalen Vision uMkhuphali Masuku usekhethe ukusayina uDouglas Sibanda, umfana owake wahlupha kuHighlanders ngensuku esadla ubhedu.
Umdlali lo, oleminyaka engu-28 yokuzalwa uselolonga okuzwayo kuleliqembu elitshibilika ku-Division One eselivume ukwengeza njalo ngabathathu abavele kuBulawayo Chiefs uMthulisi Sibanda, Mkhululi Bhebhe lemvimbi etshisayo uAdrian Banana.
Inengi labalandeli benguqu bakhumbula uSibanda ngesikhathi esatshibilika kuHighlanders, esenelisa ukulibamba eyimvimbi lasesiswini senkundla.
Ngokubika kwabacubunguli bomdlalo wenguqu, uSibanda labadlali abaphuma kuBulawayo Chiefs ungomunye wabadlali abalakho ukuphakamisa iTalen Vision ngoba uza kuleliqembu ethwele ubungcitshi lolwazi lomdlalo.
Iphephandaba likazulu lixoxisane loMasuku ngoLwesithathu emini lapho umqeqetshi lo abike ukuba usebatholile abadlali bonke.
“Inhloso yami yikuthi sidlale ngcono kulalokho esakwenza ngesizini edluleyo. Kuliqiniso sibili, uDouglas Sibandae usengumdlali wethu. Siphakathi kwamalungiselelo esizini entsha, sikhangelele ukuthi sikhankasele ukuyithwala inkezo yeligi lokunqoba imidlalo,” kutsho umqeqetshi lo.
Iqembu likaMasuku liqede lithe khoxo kunombolo yesithathu kuligi ka-Division One kumhlubulo ongezansi yelizwe. Umqeqetshi lo ubengayiphakamisa iTalen Vision iqoqodele enkundleni zePSL ngenxa yobungcitshi bomdlalo ochaywa ngabadlali bakhe. Wehlulwa yiTsholotsho lentshantshu iHwange.
“Siyilindele imidlalo yethu njengoba siphezulu kohlelo lokuqinisa abadlali. Asila abadlali abalodumo kodwa labo esilabo yibo esibathembileyo,” kutsho uMasuku.
UMasuku ubumba iqembu kanje esazi ukuthi umthwalo awuphetheyo umkhulu nanko kumele ayithwale inkezo ka-Division One.
Kusenjalo, iqula elikhokhela iligi ka-Division One ezansi yelizwe libika ukuba umhlangano wamaqembu uzaqhutshwa ngoMgqibelo lapho okuzakhulunywa kabanzi ngodaba lwemali lokusekelwa komncntiswano.
Iligi le ayilamvuzo ngaphandle kokuphakanyiswa kwentshantshu isiya kuPSL.
Kwezenkundla zePSL, isikhulumi seligi le uKudzai Bare utshele uMthunywa ukuba amathimu sekumele abhalise abadlali, bathole incwadi zemvumo yokudlala, anduba kuvulwe isizini.
IPSL itshutshisa amaqembu ilandela isinqumo senhlanganiso yeFifa esokusebenzisa uhlelo lwe-Connect olwenza kubelula ukuthi amathimu atholise abadlali incwadi zokudlala.
“Sifuna ukuqala ukwenza umsebenzi wokunikeza abadlali ama-licence. Amathimu wonke atshelwa ngalokhu,” kutsho uBare.
