uMthunywa
Nkosilathi Sibanda
IQEMBU le-Umkhathi Theatre Works libika ukuba selipheke indlikizane yomdlalo omutsha wokuhlonipha inkosi yamaNdebele uLobengula.
Umdlalo lo uzabukiswa enkundleni yeBulawayo Theatre mhlaka 7 lo 8 Mfumfu kusukela ngehola lesithupha ntambama.
Kubikwa umcabango wokuthi kulingiswe ngenkosi uLobengula wavela kuNkosikhona Ndlovu.
UThabani “TH” Moyo, ongumbalisi, nguye owaloba umdlalo lo, oqondiswe nguMatesu Dube, umqondisi we-Umkhathi Theatre Works.
Umdlalo lo ugxile ezinsukwini zokucina zenkosi uLobengula kunye lezimpi phakathi kwesizwe samaNdebele labelungu. Enye inhloso yalumdlalo yikuqondisa imbali mayelana ngoLobengula lokulondoloza amasiko.
Phakathi kwalumdlalo, kulembali ngokubaluleka kwamaqhawe esizwe abalisa umkhokheli wamabutho enkosi uGeneral Mtshana Khumalo.
UMatesu Dube ongumqondisi weMkhathi Theatre Works, ekhuluma lephephandaba likazulu ngoLwesibili, uthe umdlalo wabo umumethe izehlakalo eziliqiniso mayelana ngenkosi uLobengula.
“Umdlalo wethu, uBayethe Nkosi, utshengisa njalo ukhumbula ukutshiswa kwesigodlo senkosi uLobengula Emahlabathini,” kutsho ubufakazi lolwazi esilutholileyo luveza ukuthi uLobengula wavuma ukuthi kutshiswe isigodlo sakhe, wasebaleka eqonde ngasemfuleni uShangani.
“Umdlalo lo uveza ukuthi mhlawumbe kwaba lamandla emvelo ancedisa ukubaleka kwenkosi, okwenza kwabanzima ukuthi abelungu bayibambe,” kutsho uDube.
Uthe ukunqoba kwamabutho kaLobengula ePupu kuzaphathwa njalo emdlalweni.
Inkosi uLobengula
“Impi yePupu ngomnyaka ka-1893 iveza ukuthi ukuhlasela kwabelungu eMatabeleland akuzange kwabalula.
“Izenzo zobuqhawe bukaMtshana Khumalo ziyachazwa kulumdlalo.
“Empini yePupu, amabutho amaNdebele enelisa ukubulala amabutho abahlukuluzi angamatshumi amathathu lane ayexotshanisa inkosi uLobengula.
Kubikwa lembali yendlovukazi uLozikeyi ikhona kundikimba yalumdlalo.
