Bhekimpilo Tshalibe
UHULUMENDE weZimbabwe encedisana lamapholisa labafundisi bamabandla atshiyeneyo benze umcimbi wokukhankasela ukuthi abantu baxeke ukusebenzisa izidakamzwa eCowdray Park ngeviki ephelileyo.
UMnumzana Sevina Ncube ongu-Chief Co-ordinator we Bulawayo Community Action Group (Bucag) uthe okwenze benza lumkhankaso eCowdray Park yikuthi bananzelele ukuthi lapho okugadelwa khona izimota yikho lapho osokuthengiswa khona izidakamizwa njalo bafuna ukusebenzisana lamapholisa ukuze bazikhiphe ebantwini.
“Izidakamizwa sezigcwele lapha elokitshini. NjengeBucag sibambisana lezakhamizi zeCowdray Park sibone kungcono ukuthi siphangise senze lumkhankaso silimukise abantu ngobubi bezidakamizwa. Okunye njalo sinanzelele ukuthi izidakamizwa zibuya zivelela emayadini kodwa umkambo wawo ulapha eCowdray Park eterminus,” kutsho uMnu Ncube.
Uthe uhlelo lolu kabaluqali, sebeke balwenza eSizinda, Tshabalala lePumula.
“Uhlelo lolu saluqalisela eSizinda saya eTshabalala lePumula South sihamba lomhlonitshwa wethu uMinister of State wakoBulawayo,” kutsho uMnumzana Ncube.
UMnumzana Pardon Munyaka ongu Deputy Director ehofisini kaMinister of State for Provincial Affairs and Devolution uthe uthanda ukubonga iBulawayo Community Action Group ngokuhlanganisa loluhlelo. Uthe njengentsha labazali bakoBulawayo, kabazilungisele ukwala izidakamizwa.
“Ngithanda ukubonga iBucag ngokuqoqa loluhlelo lokulimukisa abantu ngengozi zezidakamizwa. Njengentsha labazali, angeke sivumele imuli kanye lomphakathi wethu ukuthi ubeyikudla kwezidakamizwa ngoba lokhu kungasibuyisela emuva njengesizwe,” utsho njalo.
Uphethe esithi njengelizwe kumele lumsebenzi uqhutshwe kuvikelwe abantwabethu kuzidakamizwa njengoba ikusasa ingeyabo.
“Izidakamizwa kazibulali kuphela umuntu oyedwa kumbe imuli kodwa zibulala umphakathi. Njengesizwe, kasiqhubekeni sivikela abantwabethu kuzidakamizwa ngoba ikusasa ngelabo,” uphetha kanje.
