uMthunywa
YiNtatheli kaMthunywa
UMJAHO weLiquor Hub Wholesalers uzaphathisa ekwelatshweni kwabantwana abalomkhuhlane wenhliziyo koBulawayo.
Lokhu kukhulunywe nguMsekeli kaMphathintambo wogatsha olubona ngeze-Industry and Commerce uRaj Modi ngesikhathi esethula ngokusemthethweni ukusungulwa komjaho walonyaka.
ILiquour Hub Wholesalers 10KM, ngumjaho osufikise iminyaka eyisithupha, osukhule waba yinsika ekuphakamiseni ithalenta lokugijima koBulawayo.
Uzaqhutshwa ngeSonto mhlaka 12 Mpalakazi enzikini yedolobho.
UModi uthe lonyaka batshintshe ukwenza ngokuzimisela ekuthini baphathise abantwana abahlaselwe yisifo senhliziyo.
“Lonyaka inhloso yikubambisana leBrave Little Hearts, inhlanganiso encedisa abantwana abahlaselwe ngumkhuhlane wenhliziyo,” kutsho uModi ngoMvulo.
“Abantwana ababili bazancediswa ukuthola ukwelatshwa elizweni le-India. Usizo lolu lubalisa ukuyahlinzwa, amaphilisi, ukuhlolwa lokudla. Umntwana munye ngamunye uzaphiwa iUS$15 000. Ukusebenzelana ndawonye lokhu kwenze ukuba sisondeze eduzane iWorld Health Organisation logatsha lwezeMpilakahle lokondliwa kuhle kwabantwana. Silethemba lokuthi ezinye inhlanganiso zizabambana lathi.”
Uthe ulokuthaba ukubika ngokuphenduka komjaho lo kulandela ukumiswa kwawo ngomnyaka odluleyo ngenxa yeCovid-19.
“Umjaho usutshintshile. Imvuzo ikhuphuliwe, okutsho ukuba usekelwe ngemali engange R50 000,” kutsho uModi.
