uMthunywa
YiNtatheli kaMthunywa
UMQANDO uzadlula utshitshiliza entanyeni kulabo abazaphatheka kumjaho weTanganda Half-Marathon ozaqhutshwa ngeSonto edolobheni leMutare.
Lonyaka abaqoqi balumjaho babika ukuba bakhangelele abadlali abanengi kulanyakenye ngoba nanko banengi asebabhalisa ukuthi baphatheke kuwo ukwedlula iminyaka edluleyo.
Inkampani yamahlamvu etiye ethandwa ngabanengi iTanganda, eyiyo ehlawulela lumjaho, ibika ukuba isilungiselele yaphelela ukuqoqa umjaho wayo.
Kuzagijinywa umango ongamakhilomitha angu-21 kulumncintiswano ozaphinda njalo unxuse lalabo abafuna ukugijima imango ye10km, 5km lama-wheelchair.
Inkampani yeTanganda Tea ibike ukuba iphosele imali engange-$15 000 kulumjaho njalo ikhangelele ukuthi iqhubekele phambili incedisa isizwe ekuthuthukiseni umdlalo wokugijima kuleli. Inengi labagijimi abaphatheke kuTanganda Tea Half-Marathon bandise ukukhethwa kuqembu eligijimela isizwe kumincitiswano ye-International Athletics Association Federation.
Kumbiko othunyelwe iphephandaba likazulu, uTsitsi Kumadiro oyisikhulu seTanganda uthe sekulindwe ukuthi kuyegijinywa.
“Umjaho walonyaka uzaqhutshwa ngeSonto mhlaka 30. Sinxusa wonke umuntu olamandla okugijima.
Inkampani yeTanganda Tea ihlose ukuphakamisa umdlalo wokugijima kuleli ngakho sizahlala sisekela umdlalo lo.”
Abagijima bengapheli umoya kuleli uNkosiyazi Sibanda, Kevin Pangiso, uSamukeliso Moyo, uWirimai Juwao loOlivia Chitate bazabangisana ukuphutsha lumango.
USamkeliso Moyo osewadla ubhedu ngokutshiya abantu uthe uzaphatheka lonyaka njalo.
UNkosiyazi Sibanda ogijima ezimele yedwa ubikele uMthunywa ukuba uzabutha yonke imivuzo.
“Ngilungiselele ukuthi lonyaka ngiye khonale eMutare. Ngiyawufuna umvuzo wakuqala,” kutsho uSibanda othe ngemva kokugijima umjaho weTanganda Half-Marathon uzaphinda ayegijima laseFolosi.
