uMthunywa
Nkosilathi Sibanda
KULANDELA ukudlala kuhle kweqembu leHighlanders kulisizini, kubikwa kuzaqoqwa umcimbi wokubonga abadlali labaqeqetshi bonke ngezicoco umnyaka ungakapheli.
Umgcinisihlalo weTshilamoya uKenneth Mhlophe ubikele iphephandaba likazulu ukuba sebevumelane labasekeli babo ukuthi kumalanga alandelayo, nxa isizini isigqitshiwe, kube lomkhosi ozaphakamisa iqembu elikhulu, kukhuthazwa abadlali ukuthi baqhubekele phambili besenza kuhle enkundleni lakumasizini azayo.
Leliqembu likhangelele ukuthi liqede lihlezi kunombolo yesine kungalane ye-Castle Lager. Ukuze yenelise lokhu, iBosso kumele inqobe imidlalo yayo eseleyo leBulawayo Chiefs kanye leChapungu. Ukuze iqanse iyekunombolo yesine, iHighlanders kumele yedlulise imiklomelo engu-45 elayo okwakhathesi, yemuke iZPC Kariba. Inhloso yayo ayisoke ifezeke nxa iZPC Kariba ingaqhubeka inqoba njalo leqembu elikunombolo yesithupha, iNgezi Platinum inganqoba, kuzakuba liphupho nje.
Umkhosi lo ozaqoqwa uza njalo imisila iphezulu kuleliqembu kulandela ukuba yintshantshu yenkezo yeChibuku Super yalonyaka.
Ekhuluma lephephandaba likazulu kuliviki, uMhlophe uthe umnyaka utshove kuhle kuhlangothi lwabo, ngesikhathi bengacabangeli ukuthi bengaphetha bezitshantshu.
“Kungenxa yokunqoba inkezo yeChibuku lokuvuka kweqembu okusifuqa ukuthi senze umcimbi wokubonga bonke abakumuli yeHighlanders. Abadlali bethu batshengisele ukuthi balakho ukuba zintshantshu zeligi. Akula eyinye indlela esingababonga ngayo ngaphandle kokuthi sibenzele idili elikhulu lokubanikeza izicoco,” kutsho umgcinisihlalo lo.
UMhlophe uthe loba inkokheli zeqembu zingakavumelani ilanga lokwenza umbuthano lo, ulesiqiniseko sokuthi uzakuba khona uMpalakazi engakapheli.
Iqembu lacina ukwenzela abadlali idili lezicoco ekupheleni kuka-2016 ngesikhathi lifikisa iminyaka engamatshumi ayisitshiya galolunye.
Kubadlali abakhona, uPrince Dube loPeter Muduhwa kungenzeka baphume lezicoco zaphezulu. UDube ubeyinsika yokunqoba kweBosso kunkezo yeChibuku, kuthi uMuduhwa akuthandabuzwa ukuthi uvuke khwatshu, etshitshiliza inguqu esuka emuva esiyaxhasa iqembu esidikidikini segedi phambili. UDube uphethe lumnyaka egiya nanko ubeyingcitshi yesithathu kukhalenda yabadlali abenze kuhle ngaphansi kweligi yeCastle Lager.
Abanye abazabongwa ngokupheleleyo babalisa uAndrew Mbeba, uNqobizitha Masuku, uAriel Sibanda obengunozinti kuzwa ilizwe lonke, uTinashe Makanda lo-Adrian Silla.
Ngaphansi komqeqetshi uHendrik de Jongh, iBosso isiqede imidlalo elitshumi lantathu inganqotshwa.
