Nkosilathi Sibanda
USEVUME ukuthi aqeqetshe iHighlanders okweminyaka emibili umqeqetshi omutsha uMark Harrison.
Ekhuluma lephephandaba likazulu ngoLwesithathu, umgcinisihlalo wethimu uKenneth Mhlophe uthe uHarrison uzasebenza kuze kufike ekupheleni kwesizini ka-2021.
“Yebo, sekwenzakele sibili. UMark Harrison usengumqeqetshi wethu. Ngikhuluma nje usevumile ngokusayina isivumelwano somsebenzi esiqala khathesi, sikhangelele ukuthi siphele ngomnyaka ozayo.
“Njengabaphathi beqembu kuyasijabulisa ukuthi sithole umqeqetshi ngesikhathi sekumele siqalise amalungiselelo esizini yalonyaka lapho esifuna ukuthi siphakamise zonke inkezo,” kutsho uMhlophe.
Umgcinisihlalo lo ulandule wonke amanga mayelana lokudingwa komqeqetshi wathi abalandeli ababekwazi ukuthi uHarrison usesihlalweni.
Uthe loba sekuvunyelwene loHarrison, okwamanje kusalindwe ukuthi lumqeqetshi athole incwadi yokuthi azosebenza kuleli, i-work permit.
Ngemva kwengxoxo loMhlophe, abalandeli beBosso baveze ukusuthiseka ngalumqeqetshi ebulenjini kusukela emini ngoLwesithathu.
“Abalandeli beqembu bazambona ngesikhathi konke sekuhlangene,” nguMhlophe lo.
UHarrison uvume ukuza eMagumeni kulandela ukuxoxisana lenkokheli zeqembu kusukela ngomnyaka odluleyo. Ungena umsebenzi obuphethwe ngu-Hendrik Pieter De Jongh.
UMhlophe utshele iphephandaba likazulu ukuba kubo bonke abaqeqetshi abakade befuna lumsebenzi, uHarrison ubedlule ngokuthi uyazwisisa isiko leHighlanders lomdlalo wayo.
Umqeqetshi lo usekhuze amaqembu amabili kuligi yeCastle Lager. Waqala ekuqembu leCaps United waseqeda ekuHarare City lapho atshiye khona umsebenzi phakathi kwesizini ka-2019.
UHarrison ulesithupha se-Uefa A lese Caf A. Imbali yakhe iveza ukuthi useke waqeqetsha kumaqembu abalisa i-Oxford United, Stafford Rangers, Everton, Chippa United leMpumalanga Black Aces.