uMthunywa
YiNtatheli kaMthunywa
UMGCINISIHLALO weqembu leHighlanders uKenneth Mhlophe uthe akulanto ayisolayo ngokudlala kwethimu loba iqede licine likunombolo yesithupha kungalane yeCastle Lager.
IBosso ibikhangelele ukuthi izaphetha ikunombolo yesine njengokutsho komqeqetshi wayo uMadinda Ndlovu ekuqaleni kwesizini.
UMhlophe uthe uzababaza kakhulu ukuba iqembu lenza kuhle ngokunqoba isitha esidala iDynamos, okwaba yinto eyahlasimulisa abalandeli bayo okwamagama.
Umgcinisihlalo lo uthe okwenza atshayele iqembu ihlombe yikuthi kulisizini badlalise abafana abasakhulayo, inengi labo elalingakaze lilugxobe enkundleni zeligi ephakemeyo.
“Umsebenzi owenziwe ngabadlali bethu bonke kanye labaqeqetshi uyancomeka. Singabe sehlulekile ukuthi siqede siphezulu kodwa ukudlala kwabafana kusithabisile. Asikhangelisisi inhloso yethu ngoba okuqakathekileyo yikuthi sanqoba imidlalo ethile eyayibalulekile,” kutsho uMhlophe.
Loba engazange akubeke egcekeni, uMhlophe welule ukuba kuzamele babonge abadlali babo abenze kuhle.
IHighlanders icine ukwenza umcimbi wabadlali ekupheleni kwesizini ka2016 ngesikhathi isasekelwa libhanga leBancABC. Okwamanje iBosso isekelwa yiNetOne.
“Ukuba khona kweNetOne kuyisibonelo sokuba iHighlanders yenza kuhle kunguqu njalo iliqembu amankampani afuna ukusebenzelana lalo. Siliqembu elaziwa ngokuqhuba inhlelo zayo ngobunono, ngakho nxa inkampani enjenge-NetOne isisekela, kutsho ukuba senza kuhle.”
UMhlophe uthe ubudlelwano babo lenkampani yeNetOne kwengeze okunengi kuqembu ngoba belingeke lenelise ukuncintisa ngesikhwama esincinyane.
Uthe ubonga abalandeli ngokugcwalisa kwabo inkundla.
“Ngithanda ukubonga abasekeli bethu bonke ngokungena kwabo eBarbourfields ikakhulu kumdlalo wethu sileDynamos. Kuyo yonke imidlalo abadlali kubakhuthazile ukuthi banqobe, bazethembe njalo. Siyabonga maBosso amahle,” nguMhlophe lo ekhuluma lephephandaba likazulu kuliviki.
“Kubalandeli bethu usekelo lwabo aluqhubekele phambili. Nxa abasekeli bethu kwezemali bebona ukubambana kwabalandeli, kuzenza kube lula ukuthi bahlale belathi,” kuphetha uMhlophe.
