uMthunywa
YiNtatheli kaMthunywa
NGESIKHATHI inengi labalandeli benguqu liphithizela ngendaba zomqhudelwano we-Afcon, iqembu leHighlanders likhethe ukuthi liyevakatshela omunye walo, uAli Baba Dube esibhedlela.
UMgcinisihlalo weBosso uKenneth Mhlophe ukhokhele leliqembu lisiya esibhedlela seMater Dei koBulawayo lapho uDube athola khona ukwelatshwa.
UDube ungomunye wabaqeqetshi benguqu abahlonitshwa ngokuphezulu ngoba wabayinsika yokuqoqwa kweqembu labasakhulayo wabumba ingcitshi ezifana laboPeter Ndlovu, Benjani Mwaruwari, Siza Khoza, Ronald ‘‘Gidiza’’ Sibanda, Adam Ndlovu, Mercedes “Rambo” Sibanda, Benjamin Nkonjera, Willard Mashinkila-Khumalo, Themba Lunga, Mckay Nyathi and Mpumelelo “Era Muna” Dzowa, ikakhulu abadlali abadla ubhedu emhlubulweni ongezansi yelizwe.
Iqembu leBosso limfisele ukuthi asile ngokuphangisa uDube.
“Sivakatshele umhlonitshwa kwezokuqeqetshwa kwenguqu ubaba uAli Baba Dube esibhedlela seMater Dei ngenxa yokuthi ungomunye wethu.
Siyamsekela, simkhuthaza njalo simkhulekela ukuthi asile masinyane.
“Njengomkhokheli wethimu yezwe lonke, iHighlanders, ngethula umbiko wokuthi bonke abalandela leliqembu, abadlali, labanye kwamanye amaqembu ukuthi siqhubeke sisekelana njengemuli, ikakhulu nxa omunye wethu engezwa kuhle njengoDube,” kutsho uMhlophe.
Umgcinisihlalo lo uthe iBosso liqembu labantu abanengi njalo ukuba lomqeqetshi onjengoDube owabumba ithalenta labasakhulayo kuyaliphakamisa iqembu.
Abathandi labasekeli benguqu bancome kakhulu isenzo sikaMhlophe lomaqhuzu wakhe uNhlanhla Bahlangene Dube.
Kulandela ukugula kuka-Ali Baba, kulabanye abadlali abakhuliswa ngulumqeqetshi asebencedisa ukuthi athole impilakahle.
Ngomnyaka odluleyo, abadlali abake badla ubhedu abahlala eNgilandi banikela okuthile kulumqeqetshi. Laba abadlali bekhokhelwa nguMpumelelo Dzowa benelisa ukuphathisa ngababelakho.
UMhlophe uthe njengoba iligi yeCastle Lager isiqhubeka ngempelaviki, ulethemba lokuthi iqembu lizaqhubeka linqoba.
IBosso iyadlala leNgezi Platinum.Umgcinisihlalo lo uthe laye kabuquthi ubuthongo nxa iBosso inganqobi.
Kusenjalo, uMhlophe uthe uthanda ukufisela uMadinda Ndlovu okonke okuhle kuqembu leGaborone United.
UNdlovu utshiye iBosso inqobe isitha esidala iDynamos, elande amadlelo aluhlaza kwele-Botswana.
