Ethel Ncube
KULOMHLABELELI wePlumtree otshengise ukuzimisela kwakhe ngokuhamba amakhilomitha alikhulu esuka koBulawayo esiya Plumtree ngoLwesihlanu kuviki ephelileyo ngenjongo yokulwisa ukusetshenziswa kwezidakamizwa.
UBabongile Sibanda ongumhlabeleli weAfrop-pop ukhethe ukuthi ahambe phambili ekulwiseni ukusetshenziswa kwezidakamizwa edolobheni lePlumtree osekubhahile.
UBabongile uhambe lumango lomnawakhe uLewis Sibanda kanye loHandsome Sibanda ongumaneja wakhe.
UBabongile Sibanda esehlangabezwe ngabantu ngesikhathi efika ePlumtree
UMthunywa uxhumane lomaneja kaBabongile, uHandsome Sibanda oveze ukuthi injongo yokulimukisa uzulu ngobubi bokusebenzisa izidakamizwa yaphumelela.
“Injongo yethu yokuhamba ngenyawo yayingeyokuthi sazise uzulu ukuthi sekulebantu abanengi abathatha izidakamizwa kungakho kumele silwisane lomkhuba lo.
“Sasuka koBulawayo ngoLwesihlanu ngo-10 ebusuku, uBabongile lomfowabo uLewis babehamba ngenyawo, mina ngibancedisa ngokubakhanyisela lokubona ukuthi bavikelekile. Bafike ePlumtree ngoMgqibelo emini ngo-4pm. Sahlangabezwa ngabantu endleleni ababephatheka emcimbini owawuse-Omadu Hotel,” kubika uHandsome.
Uqhubekele phambili esithi okunye okwenza umhlabeleli lo wenza lokhu yikulimukisa abantu ukuthi bangaze bathula nxa bebona abantu besebenzisa loba bethengisa izidakamizwa.
“Ukusetshenziswa kwezidakamizwa bekungavamanga ePlumtree kodwa okwakhathesi inengi labatsha selingenwe ngumkhuba lo omubi.
Izidakamizwa
“Ngokuhamba lokhu sasikwazi ukuthi abantu bazakhuluma enkundleni zokuxhumana basabalalise ivangeli lokuthi wonke umuntu kumele aphatheke ekulwisaneni lezidakamizwa,” kutsho uHandsome.
Umhlabeleli lo osakhulayo, uBabongile usanda kukhipha ingoma yakhe ekhuluma ngezidakamizwa, etholakala kupeji yakhe ye-YouTube ethi Guquka ekhuluma ngezidakamizwa.