UMguni utshiya ezemidlalo

07 Jan, 2021 - 00:01 0 Views
UMguni utshiya ezemidlalo Anna Mguni

uMthunywa

YiNtatheli kaMthunywa
UMBUSO ka-Anna Mguni kunhlanganiso yeZimbabwe Olympic Committee (ZOC) ufike emaphathelweni ngemva kweminyaka eyisitshiya galolunye.

UMguni utshiye isihlalo sikamaqhuzu walinhlanganiso lapho iZOC ebike ukuthi isiqhatshe uStephen Mudawarima ukuthi athathe lesi sikhundla.

Kumbiko wayo ngokuthola umaqhuzu omutsha lo, iZOC ithe uMudawarima, obevele elilunga lebhodi yayo, uzaqala umsebenzi kulinyanga.

Umaqhuzu lo ubatshazwa umhlaba wonke njengesazi sokuvikelwa kokusetshenziswa kwezidakwamizwa ku-World Anti-Doping Agency (WADA).

Isikhulu lesi sesike sasebenze lakumidlalo emikhulu ebalisa imncintiswano yeRio Olympics, All Africa Games, Zone VI, Youth Games le World Karate Tournament.

Iphephandaba lixhumane lomaqhuzu omutsha lo ngoLwesibili othe uzizwa eselungele ukuthi aqhubeke ngomsebenzi wokuphakamisa ezemidlalo kuleli:
“Bengiphakathi kwe-Zimbabwe Olympic Committee njengelunga lebhodi ngakho angimutsha lapha. Okwakuqala okusemqondweni wami yikuqhubeka ngenhlelo zokusabalalisa imidlalo izwe lonke ukuze isizwe sithole ithalenta elisakhula,” kutsho umaqhuzu omutsha lo.

Ubalise ukuba uhlelo lwe-ZOC lokuvuselela imidlalo olwe-Long-Term Development Strategy kumele lukhangelisiswe.

“Akumelanga sikhangelele ukuthi siyencintisa kuphela kodwa ukufika siphumelele sithole izicoco. Lokhu kutsho ukuba sijulisise uhlelo lwethu. Abadlali bethu kufuze baphathiswe, bacetshiswe ngokuqakatheka kokuncintisa kusibanga sama-Olympics.”

Uthe okumqoka kulakho konke yikulolonga ithalenta kwabasakhulayo.

“Igoqwa isemanzi ngakho kuhle ukuthi sibe labasakhulayo kuyo yonke imidlalo hatshi ukweyama kulabo asebadla udumo kudala. Inhlanganiso ye-ZOC iyabe yenze iphutha ingehluleka ukuthi ikhulise ithalenta.”

Ibhodi ye-ZOC ikhulume kabanzi ngoMudawarima isithi nguye obefanele ukuthatha isikhundla sikaMguni.

Share This:

Sponsored Links