Langalakhe Mabena
AMALUNGISELELO esikhumbuzo seNkosi uMzilikazi, asezingeni eliphezulu ngokutsho kwabaqoqi bomgubho lo.
Indlela ziqonda eMhlahlandlela Heritage Site, eMatobo esabelweni seMatabeleland South lapho okukhangelelwe ukuthi kubuthane inengi labantu kunye lezinduna zomdabu.
Kuzabe kungumkhosi wetshumi lambili kukhunjulwa uMzilikazi owazalelwa eMkuze, eZululand eSouth Africa ngo-1790. Wazalwa nguMatshobana kaMangethe lo Nompethu kaZwide.
Mzilikazi
Wakhothama mhlaka 9 Mpandula ngomnyaka ka-1868, wafihlwa Entumbane, eMatobo.
Omunye wabaqoqi bomgubho, uMnumzana Ntando Ndlovu uthe konke kuhamba kuhle kumalungiselelo abo.
“Ahamba kakuhle amalungiselelo. Sikhangelele ukuza kwabantu abanengi, njengalokhu okujwayele ukwenzakala minyaka yonke.
“Sizabe zilezinduna zomdabu labanye abahlonitshwa abaphuma kundawo ezitshiyeneyo. “UMgubho weNkosi uMzilizaki uthakazelela iNkosi yethu,” nguNdlovu lo.
Kubikwa mhla welanga kuzaqala ngodwendwe lwabantu besuka eMatshobana beqonde eCity Hall, bekhokhelwa libutho.
“Leli lithuba lokuvunula njalo sithakazelela amasiko ethu, kungakhathalekile ukuthi uliNguni, Kalanga, Xhosa, Venda. Siyisizwe sinye. Kuzabe kulusuku lokutshengisa amasiko ethu,” kutsho uNdlovu
Ingcitshi kwembali, uMnumzana uPathisa Nyathi uveze ukuthi ibizo leNkosi uMzilikazi lizahlala likhona ngenxa yokuqina kwakhe ekwakheni isizwe samaNdebele.
“Sikhumbula iNkosi uMzilikazi ngokudala isizwe, yikho okuqakathekileyo. Ungumdali wesizwe samaNdebele ngakho kumele akhunjulwe, akhunjulwe ngemisebenzi emihle yokubumba isizwe kunye lokusigcina sindawonye,” kutsho uNyathi.
