uMthunywa
Nkosilathi Sibanda
NGESONTO amalunga eqembu leHighlanders azaqhuba umhlangano omkhulu womnyaka kodwa abalandeli bayo bathi sekubaphuzele ukuza kokhetho lukamongameli olukhona ngeviki ezayo.
Njengenjwayelo, kukhangelelwe ukuthi kube lokufuthelana kumalunga azangena kulumhlangano osulindwe ngamehlo abomvu kulandela ukudluliselwa phambili ngoZibandlela.
Alamalunga azafuna ukubuzisisa okunengi ngesiphatho saleli iqembu lenguqu eselenze isimanga ngokuba ngelokuqala ukuba lomgodi wegolide kuleli.
Osabambe isikhundla sikamgcinisihlalo uKenneth Mhlophe uzayethula umbiko wakhe echaza ngesimo seqembu lokuthi likhangelele ukuya ngaphi kwelizayo.
Amalunga azaytehulelwa njalo isimo sesikhwama semali ngumgcinisikhwama uDonald Ndebele.
Lomhlangano uzayehlukana leminye ngoba awusoke uvumele abantu abedlula amatshumi amahlanu ukuthi babuthane ngesikhathi sinye.
Ukufuthelana kwabadlali kuzabonakala ngesikhathi sekusethulwa labo abazancintisa kumavoti.
Awaboni ngaso linye amalunga eBosso nxa kufike isikhathi somhlangano lamavoti. Bakhona abasola indlela uMhlophe aphathwa ngayo liqula lenkokheli zebhodi.
Inengi labo ngelisekela uJohnfat Sibanda ofuna ukuba ngumgcinisihlalo.
UMhlophe usolwa ukuthi kungani ephiwa ithuba lokuqhatsha abaqeqetshi lokwenza isivumelwano lamankampani ngesikhathi kusalindwe ukhetho.
IHighlanders isiphendukise abaqeqetshi abayibalekelayo. Abayivumi laba abalandeli bakaJohnfat ukuthi uMhlophe nguye owadinga umgodi wegolide.
“Sasivele sakutsho ukuthi lo esilwisana laye (uMhlophe), uzakuba lenzuzo ukwedlula thina nanko sekwenzakele.
“UMhlophe wasayina isivumelwano esingacaciyo lenkampani yomshwalensi. Ngeviki edluleyo, sibale kumaphephandaba ukuthi usevume ukuphenduka kwabaqeqetshi abathathu. Uhlangane labaqeqetshi lab kungela imvumo yeHighlanders,” kutsho iqula elisekela uJohnfat Sibanda.
“Iqiniso ngomgodi wegolide liyaziwa. UMhlophe ayisuye owadinga wathola lumgodi kodwa kwakungu Mama uJudith Moyo umphathintambo kaHulumende koBulawayo owabuya lombono lo…..”
Kwezinye inhlangothi, uMhlophe usephenduke waba yisithandwa kumalunga eqembu amanengi, okuveza ukuba kungenzeka ukuthi amavoti amanengi awathole.
Umkhankaso wakhe wawuqalisa ngomnyaka odluleyo ngesikhathi inengi lisalibele. Nguye yedwa osetshengisele ukuthi ulomqondo wokuvuselela inhlelo zeBosso ibeyithimu yakulezi insuku.
Utshele iphephandaba likazulu ukuba ingqobe ikumalunga azavota kodwa uyakholwa ukuthi uzaphiwa omunye umlandu.
“Imsebenzi yethu njengenkokheli ibonwa ngabantu. Amalunga labasekeli beHighlanders bazakhuluma mhla welanga lokuvota ukuthi inkokheli esebenzayo yiphi. Ngilethemba lokholo ukuba ngizaphiwa ithuba lokuthi ngiqhubekele phambili ngiphakamisa iqembu,” kutsho uMhlophe.
