YiNtatheli kaMthunywa
KWEHLE iyezi elimnyama kumdlalo wekhilikithi kulandela ukudlala emhlabeni kwengcitshi yalumdlalo, uHeath Streak.
UStreak wayengumdlali weqembu lesizwe, waphinda wabangumqeqetshi walo. Ubeleminyaka yokuzalwa engu-49. Udlule emhlabeni emzini wangakibo Entokozweni Farm, esiqintini seNyathi esabelweni seMatabeleland North.
Ubebizwa ngokuthi nguMgibisi kulindawo njalo ubesikhuluma engasikilizi isiNdebele.
Uyise uDenis uqinisekise lokhu, wabika ukuba uHeath ubegula okwenyanga eziyisithupha ezedluleyo. “UHeath ubengezwa kuhle. Kunyanga eziyisithupha ezedluleyo, ubekhathazwa ngumkhuhlane wemvukuzane. Udlule emhlabeni ngehola lakuqala ekuseni,” kutsho uDenis.
Abangane labadlali bekhilikithi umhlaba wonke sebethumele imbiko yenduduzo kumuli kaStreak. Abadlali bakuleli abazakhela amabizo kukhilikithi, abakhula loStreak kwakunguTrevor Madondo, Guy Whittall, Craig Wishart, Henry Olonga loMpumelelo Mbangwa.
Iphephandaba likazulu livakatshele epulazini likaStreak laxoxisana labomakhelwane ababike ngokudana okukhulu ukuthi balahlekelwe.
“Bengimazi kakhulu uMgibisi. Wayeyindoda eqotho, elenhlonipho njalo. Ubelithanda ibhola lenyawo, kwesinye isikhathi ubelibukela lomkami. Sizwe ubuhlungu,” kutsho uBhejiwe Sibanda ongumakhelwane.
UBigboy Dube ongomunye wabalimi abaseduzane lakoStreak uthe: “Siphelelwe. Nxa ubumazi undoda lo, wayezehlisa. Sonke lapha sathola ulwazi kuye, safunda okunengi ngokulima ngoba wayesincedisa kunhlelo ezinengi.”
Lomabhalani omkhulu wekhansili yakoBulawayo uChristopher Dube wethule amazwi enduduzo.
“UStreak, owazalelwa koBulawayo, udlale indima enkulu ekuthuthukiseni umdlalo wekhilikithi koBulawayo, elizweni lasemhlabeni wonke jikelele. Njengomsunguli weHeath Streak Academy wenelisa ukuvulela abasakhulayo amathuba. Idolobho lakoBulawayo lethula induduzo kumuli yakoStreak, umkakhe uNadine labantwana,” ngumbiko kaDube.
Kusenjalo, kubikwa kuzaqhutshwa umbuthano wesikhumbuzo sikamufi ngoLwesihlanu eMystique Gardens, eFourwinds koBulawayo.
Umbiko ovele kumuli yakoStreak uthi isikhumbuzo sizaqala ngehola lesithathu.
“Imuli yakoStreak inxuse wonke umuntu ukuthi azothakazelela impilo yalindoda eyathinta impilo zabantu abanengi.”
