uMthunywa
Wayne Ncube
KUDABA olusabhayisikopo kulexhegu elibonakale lindiza emoyeni okukhanye angathi belivela esibhakabhakeni andubana lifike lizimele edolobheni lakoBulawayo ngempelaviki ligqoke isudu yalo yokuzalwa.
Ixhegu leli, uMnumzana Roy Khahlu oleminyaka engu-66, olenwele esezimpunga wethuse izakhamizi zakoBulawayo ebeziphakathi kuka 11th Avenue kanye loFort Street ihola lika-8 ebusuku lingakatshayi.
UKhahlu obebhunyumunyu uthe ebona abantu sebemthe nhlo wacela ezinyaweni kodwa abantu bamhlala izithende befuna ukwazi ukuthi angabe engumthakathi na.
Intatheli kaMthunywa izibonele ngawayo amehlo ixhegu leli selimiswe eduzane lenye ibhawa eku-11th Avenue loGeorge Silundika nanko phela abantu ababesebhawa bathi bebona uKhahlu enqunu bamgombolozela bambuza ukuthi uvela ngaphi.
UNkosazana Prudence Modise obekhona uveze ukuthi wazibonela ngawakhe amehlo uKhahlu esehla emoyeni ebhunyumunyu.
“Ukhulu lo wehle evela emoyeni enqunu, ngehola lika-8 ntambama. Lokhu kusethusile kakhulu njalo sihle sacabangela ukuthi angabe engumthakathi ngoba lokhu ngathwetshulwa yingwe kangikaze ngikubone okunje.
“Simbuza ukuthi ungubani njalo uvela ngaphi, uKhahlu uthe ungumfundisi njalo uvela ezulwini,” kutsho uNkszn Modise.
Intatheli iphinde yakhulumisana loSinokuthaba Dube othe uMnu Khahlu engabe engumthakathi kodwa kukhona okutshaya amanzi ngaye.
“Ukubona umuntu omdala esehla evela emoyeni athi uvela ezulwini kuyethusa ngoba umuntu lo kakhithikanga kodwa wehle wazihambela kuhle kazange anyele ngitsho kumbe awe,” kuchaza uNkszn Dube.
UMnumzana Kwanele Ncube ohambe loKhahlu enkambeni yamapholisa yeCentral uthe kakaze akubone lokhu.
“Sizwe umsindo uvela esibhakabhakeni sathi sikhangela sabona indoda ibhunyumunyu indiza ithe isifika phansi yanyathela samuntu owehla isitepusi. Lokhu kwabiza abantu abanengi abamgombolozeleyo bembiza ngokuthi ungumthakathi abanye bedobha amatshe befuna ukumkhanda. Isimanga yikuthi wayephendula okomuntu ophile kuhle ngesiNdebele, isiShona kanye lesiLungu,” kutsho uMnu Ncube.
Ixhegu leli lacina lisiwa esibhedlela seUnited Bulawayo Hospitals. Isikhulumi samapholisa uAssistant Inspector Nomalanga Msebele uthe uzadingisisa ngodaba lolu ngoba alukafiki ezandleni zabo.
