uMthunywa
Thokozile Mbedzi
KULOMFUNDISI webandla leZCC obulele umzalwane enhlane kulandela ukumtshaya ngentonga yakhe ethi umkhipha amadimoni eMedium density eBeitbridge.
Kubikwa umfundisi uCrispen Gomore oleminyaka engu-34 yokuzalwa ohlala ku 1159 eMedium density utshaye uPraymore Mazangari oleminyaka engu-34 yokuzalwa ohlala ku-2114 eMashavire okubikwa wahamba lomkakhe besiyadinga uncedo kubandla leZCC mhlaka 2 Mbimbitho lapho abafika babikelwa ukuthi kudingeka ukuba bahlale khona esetshenzwa. Ekhuluma lentatheli kaMthunywa uMnumzana Tendani Mleya uthe lokhe bekhakhamele ngesimanga esenzakale esontweni.
“UMazangari wafika esontweni ezoncediswa elomkakhe wasetshelwa ukuba kudingeka ukuba bahlale lapho ngesikhathi bethola usizo. Ngaleso sikhathi wayethi nxa ekhulekelwa kuphume idimoni umfundisi asebenzise intonga yakhe ukutshaya lelodimoni.
“Inina leli laqala ukutshaywa ngesikhathi lithandazelwa okwakuqala kwaze kwayafika usuku lwesine lilokhu litshaywa laze lafa kuthiwa likhitshwa amadimoni elilawo.
“Lokhu kusethusile njalo kusivule inkophe ukuba abantu abanengi bafakwa izinyalo emzimbeni lapho abathandazelwa khona egangeni becabanga ukuthi bayelatshwa,” kulandisa uMnu Mleya.
U-Officer Commanding Beitbridge District, uChief Superintendent Tichaona Nyongo uthe amapholisa abophe indoda etshaye inina ngentonga laze lafa.
“Sibophe uCrispen Gomore ngecala lokutshaya elinye inina besendaweni yabo yokukhulekela. Inina leli lafika lisiyancediswa mhlaka 3 Mhimbitho, mhlaka 6 latshaywa ngentonga umzimba wonke ngesikhathi lithandazelwa.
“Kuthe mhlaka 8, inina leli lilokhe lisenhlane lavuka lifile,” kuphetha uChief Supt Nyongo.
