uMthunywa
Thokozile Mbedzi
KULOMFUNDI wesikolo seWhite Water Primary School eKezi obhubhe ngeviki ephelileyo kulandela ukuwelwa yinkalakatha yembokodo yelitshe esifubeni ngesikhathi ethunywe labanye abafundi ukuyathezela ababalisi inkuni.
Umfundi lo okungasatholakalanga igama lakhe ubefunda ibanga lesikhombisa.
UMthunywa uzwe ukuthi umfundi lo wanyathela ilitshe watshelela wawa ngokuswelakala kwenhlanhla lelolitshe lagiqika lamwela esifubeni okuyikho okwabangela ukuba alimale kakhulu.
Esinye isakhamuzi sakulindawo uMnumzana Thembelani Sibanda uveze ukuba ingozi le ibadanisile ngoba abantwana bavele bayathunywa ngababalisi babo ngazo zonke izikhathi.
“Abantwana izikhathi zonke, lathi sasithunywa ngababalisi bethu, lokhu kube yingozi esehleleyo sonke njengezakhamizi kunye lababalisi bethu. Kumele simanyane ukuze senelise ukukwamukela ngoba ngumthwalo onzima lowu esibhekane lawo.
“Okubuhlungu yikuthi abantwana babebodwa ekuthezeni sinakana ukuthi ngabe umntwana lo waphangisa ukuthola usizo ubezasinda engozini le,” kutsho uMnu Sibanda.
Isikhulumi samapholisa esabelweni seMatabeleland South uInspector Philisani Ndebele ebuzwa ngaloludaba uvumile ukuthi solufikile ehofisini yakhe.
“Samukele umbiko womfundi ofileyo kodwa udaba lolu ungathola okunengi ngalo kwabasemahofisini ezemfundo,” kutsho uInsp Ndebele.
UProvincial Education Director wesabelweni seMatabeleland South uMnumzana Lifias Masukume uthe udaba lolu lungabe luseseku District ngoba alukafiki kuye.
“Indaba le ingabe isese kuDistrict ngoba kimi ayikafiki, okutsho ukuthi bazangazisa ngayo,” kutsho uMnu Masukume.
Kusenjalo kulomunye njalo umfundi welokitshini lePumula koBulawayo ogxotshwe yigonyethi ethwala utshwala wahle wafela khonapho.
Umfundi lo obefunda uECD usele izitho zomzimba ziyizicucu kodwa isimanga yikuthi isandla sisele silokhu sifumbethe itshintshi kunye lesuphu ayeyithunywe ngunina.
UNkosazana Malini Bhebhe obekhona kusenzakala uthe basele bephethe izibindi ngezandla igonyethi le itshaya umntwana lo.
“Umsindo obekhona ngesikhathi umntwana lo etshaywa yimota ubemkhulu kakhulu. Lokhu ngathwetshulwa yingwe kangikaze ngikubone okunjeyana njalo ngeke ngikukhohlwe futhi,” kutsho uNkszn Bhebhe.
Isikhulumi samapholisa koBulawoyo ebuzwa ngaloludaba uthe ………………………………………………………………………………………………………………………………………………………………………………………………………………………………….
