Uncategorized

Umfundi ubanjwa iganyavu evela kuma-extra lessons

09 May, 2024 - 00:05 0 Views
Umfundi ubanjwa iganyavu  evela kuma-extra lessons ulnspector Glory Banda

uMthunywa

Thokozile Mbedzi 

ZILOKHE zinkemile izakhamizi zelokitshini leMpumalanga eHwange ngemva kokuzwa ngomfundi okuFomu 3 okubikwa uhlaselwe ngenye indoda evela kuma-extra lessons yamdlwengula ngeviki ephelileyo.

Umfundi lo, okugodlwe igama lakhe ngenhloso yokumvikela, ufunda esikolo seFatima njalo  wehlelwa ngamashwa la evela kwenza ama extra- lesson ngemva kwehola lesithupha ntambama. 

Ekhuluma lentatheli kaMthunywa uNkosazana Sanele Ncube uthe balokhe benkemile ngesehlakalo lesi.

“Lokhe sinkemile silapha ngesiga esisehleleyo esibuhlungu. Umfundi lo ubevela kwenza ama-extra lesson, ekuphendukeni kwakhe wasesebenzisa indlela yokuqumela edlula egangeni esebuyela ngakibo.

“Umfundi lo uthe ephakathi laphakathi kwesikolo seMegawatt Primary School leNechibondo Primary School wasehlangana lenye indoda yahle yamhlasela  yamdonsela egangeni yamhlubula impahla yangaphansi yamdlwengula.

“Indoda le ithe iqede ukwenza isihluku lesi yadliwa ngumswenya yatshiya umntwana egangeni,” kulandisa uNkszn Ncube.

Kubikwa umfundi lo kazange achaze efika ngakibo ngoba ethuselwe ngumetheswacala kodwa ngemva kwensuku ezine wasebulawa yisisu wasechaza okwakumehlele kunina.

Wagijinyiselwa esibhedlela seSt Patrick’s.

Isikhulumi samapholisa esabelweni seMatabeleland North uInspector Glory Banda ebuzwa ngodaba lolu uvumile wathi solufikile kibo.

“Udaba lomfundi odlwengulwe evela ezifundweni zama –extra lessons solufikile kithi. 

“Amapholisa asaphenyisisa ngodaba lolu njalo acela uzulu ukuba ongabe elolwazi lalapho okulometheswacala azise amapholisa aseduzane.

“Amapholisa akhuthaza uzulu ukuba nxa ehamba endaweni eziliganga bengabohamba ngamunye bahambe bebanengi njalo bengaboqumela, kabahambe lapho okuhamba khona abantu abanengi,” kuphetha uInsp Banda.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds