uMthunywa
YiNtatheli kaMthunywa
KUDABA olungundabamlonyeni esigabeni seBezu, eBulilima esabelweni seMatabeland South kulomfana oleminyaka engu-15 ofe ngendlela engazwisisekiyo kulandela ukuhlatshwa ngameva ngoMvulo.
Umuyi uArtwell Tshuma obefunda ibanga likaFomu 3 eBezu Secondary School ubhubhe kuviki ephelileyo ngoMgqibelo.
UKhansila wakuWadi 3 eNatane, uKhansila Innocent Mavunela uthe isehlakalo lesi sitshiye isigaba sonke sikhakhamele.
“Kuliqiniso ukuthi kulodaba olwenzakeleyo olunjalo esiqintini sami. Isiga lesi sisenzakala, uArtwell wayeloPolite Sibanda (31) osebenza komunye umuzi. Ababili laba babesemasimini. Bafika bagada isiduli bedinga i-network njengoba ihlupha ngekhaya. Khonokho nje umfanyana wahlaba umkhosi wathi usehlatshwe ngameva enyaweni lwesenxele,” kutsho ukhansila Mavunela.
Ukhansila uqhubekele phambili wathi uSibanda kunye lo Artwell kabazange bawabone ameva ayemhlabile esicathulweni ayesigqokile.
Kubikwa uSibanda ekhangela uArtwell wabona nje ithonsi legazi ngaphansi konyawo.
“”Isiga lesi senzakale ngoMvulo kuviki ephelileyo njalo bakutshaya indiva kodwa ngoLwesithathu umfana waqala ukukhala ngobuhlungu njalo lonyawo lwaseluthwalekile. Bahamba ekilinika omongikazi bamdlulisela esibhedlela sePlumtree kodwa kabazange baye esibhedlela, isimo saqhubeka sisiba sibi ngamandla,” kulandisa uKhansila Mavunela.
Uthe babikela omakhelwane isimo sesisibi nanko phela umfana lo wayesekhupha njalo esezitshiya.
Ukhansila uthe uArtwell wabhubha ngoMgqibelo ngehola lika 5 ntambama.
“Kunzima ukuzwisisa ukuthi kwenzakalani ngoba sihlatshwa ngameva nsukuzonke emakhaya kodwa okunje kasikaze sikubone. Isigaba sonke simangele. Silemibuzo eminengi ukwedlula impendulo,” kutsho yena.
Omunye umakhelwane ongathandanga ukuqanjwa ngebizo uthe umbiko we-post-mortem uthe umfana lo wabulawa yikwethuka kanye lokuhlukumezeka.
“Kubi ngoba lathi kasizwisisi ukuthi lokhu kutshoni ngoba izikhulu kazizange zisichasisele. I-post-mortem kayizange isisize ukuphendula imibuzo esilayo. Ujaha lo ubekwe izolo” kutsho umakhelwane lo.
Isikhulumi samapholisa esabelweni seMatabeleland South uInspector Loveness Mangena usiqinisekisile isiga lesi wathi amapholisa yiwo athatha isidumbu asisa ePlumtree ukuze siyohlolwa.
