uMthunywa
YiNtatheli kaMthunywa
KULENDODA yesigabeni seMapili eBeitbridge etholakale izibophele emzini kamnewabo kulandela ukwaliwa ngumlamu womnewabo, uMthunywa uyakuveza lokhu lamhlanje.
Iphephandaba likazulu lizwe ukuthi uNdiyafhi Ndou oleminyaka engu-35 uzibophele kuviki ephelileyo ngemva kokwaliwa ngumlamu kamnewabo abesefuna ukumthatha ngoba esethandana lenye indoda.
Ekhuluma lentatheli kaMthunywa uMnumzana Thanyani Siziba uveze ukuthi lokhe bekhakhamele ngesenzo sikaNdiyafhi sokuzibulala ngoba engafuni ukwaliwa.
“Kukhanya uNdiyafhi wehlukana lomkakhe akade belabantwana abane bonke ngoba esethandana lomlamu wakhe.
Asazi ukuthi kusuke kwathini ngoba bekungathi besebezathathana ngoba wonke umuntu ubesesazi ukuthi ababili laba bayathandana.
“Ngabona ukwaliwa lokhu yikho okungazange kumphathe kuhle wasekhetha ukuzibophela emzini womnewabo, mhlawumbe ubefuna ukutshengisa unkosikazi womnewabo ukuthi impilo yakhe isitshabalele ngenxa yomnawakhe,” kulandisa uMnu Siziba.
“Okusizwise ubuhlungu yikuthi uzibophele ebusuku endlini abagezela kuyo kodwa ekuseni kabazange bambone ngoba bavuka baqonda endaweni ezitshiyeneyo waze wabonwa ngumntanakhe oleminyaka engu-8 owayethunywe ngugogo wakhe ukuba ayeboleka ibhakede koyise omdala yikho ukubona uyise elenga,” nguSiziba lowo.
Omunye njalo umakhelwane ongathandanga ukuqanjwa ngebizo uthe isenzo sikaNdou sokuyazihilela emzini womnewabo siveza ukukhathazeka kwakhe ngaphakathi.
“Mhlawumbe okumenze wayazibophela endlini yomfowabo yikuthi ubefuna ukuveza inhlungu ahlangane lazo ngomlamu wakhe njengoba kuyinto laye abeyazi lomkakhe.”
Usobhuku walesisigaba uMnumzana Steven Lamola ebuzwa ngodaba lolu uvumile wathi lwenzakele njalo ulokhe edidekile njengomphathi ngeyezi elimnyama elehle esigabeni sakhe.
“Asazi sibili ukuthi uNdou ungenwe yini, aluba uthe ebona ukuthi ulohlupho wasibikela kulokuba azicitshe umphefumulo atshiye abantwana abane bonke akade bekhangelele kuye njengoba ubesehlukene lonkosikazi wakhe.
“Ngithanda ukuxwayisa uzulu ukuthi nxa elohlupho kakhulumisane labaphathi besigaba loba amapholisa kulokuthi silahlekelwe yimpilo mahlayana nje,” kutsho usobhuku uLamola.
Umlisa wakulindawo uMnumzana Liberty Mleya ebuzwa ngodaba lolu uthe udaba lolu waluzwa njalo kuyisimanga ngoba bona ngokwesiko labo nxa umuntu elohlupho uyabika udaba lwakhe luhluzisiswe hatshi ukuthi umuntu athathe umphefumulo wakhe.
“Ngibikelwe ngodaba lwendoda ezibophele emzini yomfowabo. Ngesiko lethu umuntu nxa elohlupho uyabikela abaphathi loba abadala kuhluzisiswe uhlupho hatshi lokhu okokuba umuntu azibulale. Ngakho uzulu nxa elohlupho kabike kulungisiswe ngendlela eqondileyo. Labemuli kumele bacace emphakathini ukuze baphathiseke ngendlela eqondileyo,” kuphetha uMnu Mleya.
