uMthunywa
Khanyile Ndebele
IJAHA lakoBulawayo elisakhulayo, uMduduzi Maurice Nzuza osezakhele udumo ngokuhlabela emcimbini etshiyeneyo koNtuthu, usehwatshe ingoma yakhe yesikhombisa ekhuthaza abantu ukuthi bengakhalali uthando.
Umculi lo, ukhuphe ingoma ethi-Never Give Up echaza iphinde ikhuthaze izithandani ngokuqakatheka kokubambelela ethandweni. Ingoma le ifinyelele endlebeni zabalandeli bomculo mhlaka 8 Nkwenkwezi lonyaka.
Ukuduma kwalingoma sekubonakala nanko isiqhunswa emcimbini eminengi lasemsakazweni.
Ekhuluma lentatheli yephephandaba likazulu uthe injongo yakhe yikukhuthaza abantu ukuthi bangadeli ukuba semathandweni.
Uthe okumkhuthaze ukucula ingoma le yikuthi laye wake waphoxwa yizithandwa zakhe kodwa wacina esethole umuntu ofuna ukumthanda amenzele konke.
“Ngibhale ingoma le ngemva kokuphoxwa kanengi, kodwa khathesi sengithole umuntu ebengifuna ukumthanda aphinde angitshengise ukuphila kamnandi emhlabeni,” kutsho uNzuza.
Uthe uhambo lwakhe kwezothando lokuhlabelela sekumfundise ukuzibonakalisa ebantwini.
“Esengikufundile kuhambo lwami ngingumhlabeleli yikuthi ngingazifihli kodwa ngizazise ebantwini ukuthi ngingubani njalo ngidume ngani,” kutsho uMduduzi.
Uthe uthanda ukubonga umhleli wakhe ngokumsekela ekukhupheni ingoma le kanye lendodakazi yakhe okuyiyo emkhuthazayo emhlabeni.
“Ngithanda ukubonga umhleli wami, uMdue Seven okunguye ongikhuthazayo kuhambo lwami kwezomculo.
Ngibonge futhi lendodakazi yami uEbenezer Nzuza onguye ongikhuthaza njalo nje.
“Umlayezo engilawo kulaba abathakazelela ukuhlabela yikuthi kufanele ukholelwe ukuthi uyenelisa ukunqoba ufeze amaphupho akho.
“Umuntu akumelenga avumele ukwehliswa. Bakhona abafuna ukukukhangelela phansi kodwa sukuma wenze okwakho,” kutsho uMduduzi.
