uMthunywa
YiNtatheli kaMthunywa
INHLANGANISO entsha esiqondisa imidlalo yeKarate kuleli eyeZimbabwe National Karate Federation isikhethe uGreatman Sibanda ukuthi akhokhele inhlelo zayo esabelweni seMatabeleland North.
Lokhu kuza ngemva kokuba inhlanganiso le ikubone kufanele ukuthi ibumbe kakutsha ingatsha zayo, inhloso kuyikuvuselela lumdlalo.
Inhlanganiso yeZimbabwe isungulwe ngomnyaka odluleyo ngesikhathi ezemidlalo zimisiwe ngenxa yegcikwane leCoronavius.
Umdlalo lo ungomunye okhwabithwa ngabantu abalutshwane, osekudale ukuthi kuvuselelwe umkhankaso wokuthi ubelodumo kuzulu.
Njengenhlanganiso entsha, amalunga eKarate ezabelweni zonke acelwa ukuthi abumbe kakutsha isikhundla lendlela lumdlalo obanjwe ngayo ngezigaba ngezigaba.
Iziphathamandla ezikhethiweyo zibalisa uGreatmans Sibanda okhokhela eMatabeleland North, uLlyod Mukucha eNkabazwe, uTinyiko Halamani (Harare), Rhodesia Mhosva (Mashonaland Central), Prichard Zishumba (Mashonaland East), Simeon Janji (Mashonaland West) lo Monica Peters ozibambe esabelweni seMasvingo.
Kwezinye izabelo kubikwa kuzakhangelisiswa ukuthi kuzakhethwa bani kulabo abakhona.
Kwatholakala ukuthi ezinye izabelo ziyehluleka ukulandela lesi isicelo, kwavela ukuthi isabelo sakoBulawayo yiso sodwa esenza okufaneleyo.
Kumbiko othunyelwe intatheli kuliviki, inhlanganiso yeZimbabwe National Karate Federation ithe yasungula ingatsha zayo ilandela izinqumo eziphawulwe yinhlanganiso ephethe umdlalo weKarate emhlabeni wonke eyeWorld Karate Federation.
