uMthunywa
Umdlalo: Indlalifa ngubani
Ophezulu Stinta
Siqhubeka ngomdlalo wethu lapho okulodaba olomisa amathe, lutshaqise lenwele. ULomkhono lapho esilwa loyisekazi uMachibini aze afike kusigaba sokumjuqula indlebe.
Ngesintu yinkalakatha yesiga esizilayo. Ngemva kwenkemenkeme le sikhangelele ukuthi uLomkhono mhlawumbe angafikelwa yikwethuka kanye lokuzisola ngalokho akwenzileyo, kodwa akunjalo isazela sakhe sicaca sikude laye.
Sibona eselendisele oNkala ngendelelo lapho ebabiza ngelenkukhu, engagqize qhakala nje khona ukuthi kutheni sengathi ngumuntu lowana othi ngizaliqondisela udadewenu.
Besathi mhlawumbe udlala amahlaya, wavele nje waphosela isiqu sendlebe phansi, loba nje uNkala ebabaza umhlolo owesabekayo otshiya uNkala ebambe owangaphansi emangele ngesenzo esingaka.
Imfundo
ULomkhono konke lokhu uthi ukwenzela bona abafowabo laba abangavuli ngitsho umlomo bekhulumela emaqhageni otshwala okwempukane.
Loba yena uLomkhono ebona sengathi abafowabo bathule kodwa ke kusobala ukuthi indoda kayihlali phansi igoqe izandla kukhona abakucabangayo, nampo besitsho ukuthi sebedwebe umgcele okokuthi uMphunzo angaweqa bayagadla abadlali.
Yebo ngaphambilini ubekhwela ezehlela phezu kwabo sebethethe isinqumo sokumfundisa okuqondileyo.
ULomkhono lo vele yena ngumuntu olomlomo mdabuko wakhe, kwala lalapho abafowabo sebemchazela ngesinqumo labo asebesithethe yena uqhubeka ebachothoza ebalulaza ngamandla.
Kungathi injongo yakhe yikuxabanisa ukudala inzondano phakathi komuzi lokuthi abantu bahlale nje besuselana amanqe kuyinhloso yakhe enkulu kakhulu.
Esingakuphawula lapha yikuthi abesilisa ngabantu abangahambeli phezulu kumbe labo abangathathi izinto ngamaphaphu aphezulu njengalokhu sibona uLomkhono esithi yena ulungisa izinto ezonakeleyo lokho ekwenza ngamaphaphu asemoyeni. Lapho izinto zilungiswa ngeyakhe indlela uLomkhono kakwandanga ukuthi kuphutshe kuhle.
