uMthunywa
YiNtatheli kaMthunywa
UBUKHOSI Ncube, imvimbi yeqembu leHighlanders obephathekile ngobuhlungu bonyawo lwakhe okwamasizini amabili, uselakho ukuthi anyathele lula nanko phela odokotela kubikwa sebeyilungisile inkinga yakhe.
NgoLwesibili iqembu leHighlanders likhiphe emphakathini ukuthi uNcube usebonwe ngodokotela ngakho kuyathembisa ukuthi uzasila.
IBosso ithumele umfanekiso kaNcube elomqeqetshi uMandla Mpofu besemahofisini aleliqembu ngoLwesibili ekuseni. Kulumfanekiso uNcube ufakwe ibhanditshi edolweni.
Kubikwa kuyathembisa ukuthi uNcube uzaletha injabulo kubalandeli bethimu le, nanko phela usila ngemva kwesikhathi eside engalugxobi enkundleni.
Ukusila komdlali lo odume ngelithi “Khosera” kuzathabisa abasekeli ngenxa yokuthi ubakhumbuza ithalenta labadlali abadla ubhedu ababalisa uSimon “MaKwe” Sibanda loNoel Kaseke.
Iphephandaba likazulu lixhumane laye lumdlali ngemva kokuhlizwa ngodokotela.
Ebuzwa ngesimo sakhe umdlali lo uthe “usepholile” kodwa kazange atsho okunengi ngoba abadlali beHighlanders abavunyelwa ukutsho imbono kumaphephandaba.
“Sengipholile sibili njalo ngiqinile,” kutsho lumdlali.
Ngesikhathi ehlezi ebhentshini likadokotela, indawo kaNcube ibikhanya ukuthi iyabehlula abanye abadlali, okuyikho obekusenza kube lula ukuthi abagadli bamaqembu bayithwalise nzima iHighlanders emhlubulweni wesandla sokhohlo enkundleni.
UNcube usetshengisele ukuthi ulekusasa elihle ngobungcitshi bakhe kuqembu njalo wabayinsika kuqula labadlali abaqoqwa nguMadinda Ndlovu ekuqaleni kwesizini ka2018, lapho iHighlanders eyaphenduka into engadliwayo.
Kwabonakala ukuthi uNcube ngumdlali wohlonzi mhla iHighlanders inqoba iDynamos ngoba wavala kwakhala abanengi.
Ekuqaleni lumdlali ubengalitholi ithuba lokuzibonakalisa okwamnikeza idlabuzane lokuthi atshengise uMadinda ukuthi ulalo ithalenta alidingayo kumvimbi zakhe.
Lakanye watshengisa lumqeqetshi ukuthi ubesenza iphutha ngokumfaka ebhentshini.
UNcube ubatshazwa ngabasekeli abathe uyenelisa ukuphasa ibhola liyefika enyaweni zabanye bakhe.
