uMthunywa
YiNtatheli ka Mthunywa
KULOMGADLI weqembu leTalen Vision osweleke ngempelaviki edluleyo ngemva kokuwela phansi enkundleni andubana athi efika esibhedlela kuthiwe kasekho.
Uzulu olandela umdlalo wenguqu usele ethithibele ngemva kokusweleka kukaCedric Dube obedlalela iqembu le Talen Vision ku-Division 3 ngeSonto.
Umdlali lo ubeleminyaka engu-18 efunda uFomu 4 esikolo seMpopoma High.
UDube uqaleke enkundleni edlala leBulawayo City lapho agijinyiselwa khona esibhedlela seMpilo bafika bathi kasekho, ubulewe yi-asthma.
Usaziwayo kwezenguqu uSibekiwe Ndlovu uthumele umbono wokudabuka kwenhliziyo ngokufa kukaCedric.
“Ngambona ekhula eleminyaka engu-14 edlalela iqembu leHighlanders labancane waze wafika i 18 years ngomnyaka ophelileyo, bekumnandi ukumbukela , sibonga uDumaza Dube onguye owamkhulisa kwezenguqu. Ngibuhlungu, umphefumulo omncane womdlali obekhangelelwe ukwenza okukhulu kwezokuvimba, usitshiyile akaphumule ngokuthula,” kukhuluma uNdlovu.
Inhlanganiso yeFootball Union of Zimbabwe ithe isizwe silahlekelwe lithalenta ebelizabonakalisa ubuhle bebhola lakuleli.
“Sidanile ngokuzwa ngokusweleka komvimbi weTalen Vision uDivision 3 uCedric Dube, imicabango yethu iphuma iqonde kumuli kanye labangane bakhe ngalesi isikhathi sobunzima, umphefumulo wakhe kawulale ngokuthula.”
Intatheli zikhulumisane lemuli kaDube lapho okuvele khona ukuthi bona bebengela lwazi lokuthi uDube ubengaba lesifo esifana lalesi ngakho lokhu kubethusile ukuthi bezwe ukuthi usebatshiyile emhlabeni.
“Siyakhala ngokulahlekelwa nguCedric, impilo yakhe ibikhona isaqala, bekunguye obekhokhela iqembu leMpopoma High emidlalweni, ngapha edlalela leqembu leTalen Vision sikhangelele ukuthi laye uzakuthi esiba leminyaka engu 19 usengenelisa ukuyadlala labakhulu,” kuchaze uMnumzana Caleb Sibanda ekhulumela imuli kaCedric.
Isikhulumi seTalen Vision uBrain Moyo uthe, “Lesi yisikhathi esibuhlungu eqenjini lethu ngoba uCedric ubengomunye wabafana ebesikhangelele ukuhamba laye kuPSL, ngakho iqembu lizaxhasa imuli ngalesi isikhathi esithi ukuba nzima.”
Iqembu leBulawayo City lalo lithumeze umlayezo wenduduzo ku-Twitter lapho abathe ukuzehlisa khona besithi langalezo kumuli kanye leqembu likaCedric.
