Umdlali lo wabalekela ukugezisa izitsha

18 Apr, 2019 - 00:04 0 Views
Umdlali lo wabalekela ukugezisa izitsha uMammelo Makhabane

uMthunywa

EYOKUTHI waliqala kanjani ibhola umdlali weSouth Africa uMammelo Makhabane, ayihlukananga leyamantombazana amanengi lasemalokitshini akoBulawayo akhule edlala labafana.

“Amantombazana ngasekhaya abezidlalela i-netball kodwa mina angizange ngiyiqale ngitsho ukuyiqala. Angazi kwenzeka kanjani kodwa ngazithola ngidlala ibhola labafana, ngithi ngangileminyaka eyisitshiyagalolunye. Ngazibona sengidlala nje.”

UMakhabane ngomunye wabadlali asebehlonitshwa kuzinga laphezulu emncintiswaneni yenguqu yabomama umhlaba wonke.

Lumdlali uthe wayehlezi ehluphana lonina bebanga ukuthi utshiya engagezisanga izitsha, ehambe usuku lonke edlala ibhola labafana.

UMakhabane (31), ungomunye  wabadlali okukhangelelwe ukuthi asize iBanyana izethule kuzwakale kunkezo ye2019 Fifa Women’s World Cup eseFrance ngoNhlangula.

“Bengihamba ekuseni ngize ngibuye ebusuku ngabo-7 ngilokhu ngidlala ibhola. Ekhaya babengelandaba lokudlala kwami kodwa indaba ibisekutheni ngitshiya ngingagezisanga izitsha ngihambe ngiyodlala ibhola ngize ngibuye sekuhlwile,” kutsho uMakhabane.

“Izitsha yiyo inkinga esasivame ukuba layo lomama. Wayengelandaba ukuthi ngidlala ibhola ngoba lamakhokho ngangiwathengelwa nguye. “

“Ngiqale ukudlala kuBanyana ngo-2005. Ngicine ukuzodlala kuyo eThekwini ngo-2011. Ngifike kuBanyana ngisadlala kuKutloano Ladies. Ngabonwa nguSkheshe Mkhonza (uJoseph). Sasidlala amaSA Games lamaLove Life Games. Ubeza ezobukela. Kwathi ngelinye ilanga ngiseklasini ngabizwa kanti nguye ozangitshela ukuthi asambe ngiyejoyina iqembu leBanyana,” kutsho uMakhabane.

Ngaleso sikhathi abadlali ayelabo kubalwa uJanine van Wyk Noko Matlou loNompumelelo Nyandeni labanye abakhona.

“Angikaze ngicabange ukuthi kuyofika le iminyaka ngisekhona (eqenjini lesizwe) loba cha. Imbangela yalokho yikuthi ngeke ubelazi ikusasa. Konke kumele ukutshiye kuMdali. Ngibonga yena ukuthi ungigcine ngila, ngamela izwe lami sonke lesi isikhathi.” 

Ngenxa yokulimala uMakhabane akakayifikisi imidlalo engu-100 njengabanye ozakwabo abadala kwazise uze wadlala kuma-Olympics eRio ngo-2016 ngemva kokuphuthwa ngabeseLondon ngo-2012.

 “Sithole inhlanhla kuma-Olympics, leChina ibikhona laphaya kanjalo leGermany (amazwe abaqhathwe lawo kuGroup B leSpain). Lokho kuzosiza ngoba siyazi silindeleni.”

Share This:

Sponsored Links