Ethel Ncube
ABACULI bembube kumele bathole inhlonipho ephezulu ngoba yibo abagcina umculo oveza imvelaphi yesizwe samaNdebele.
Kubonakele kuliviki ukuthi umculo wembube ulokhe uthakazelelwa kuleli, kumkhosi wokunanza ilanga lokusungulwa kwedolobho lakoBulawayo, oqale ngoLwesihlanu ngeviki edluleyo.
Abaculi beSicathamiya baphakanyisiwe, batshayelwa ihlombe ngokuqhubeka bejabulisa uzulu ngomculo wabokhokho. Okuvele phambili kukho konke yikuthi imbube iyingxenye yesizwe samaNdebele ngakho, akumelanga ilahlwe.
Inhlonipho ephiwe abaculi bembube yethulwe kumcimbi oqhutshelwe enkundleni ye-Amphitheatre koBulawayo.
Emcimbini lo bekulabahlabeleli abadumileyo abathi uJeys Marabini, uMadlela Skhobokhobo, imbongi uObert Dube, iBlack Mfolosi, Great Stars iJongosi, Amaqaqa labanye.
Inkundla ivulwe liqembu lekhwaya yeKhami Prison eliyilo eliqale ngamaphimbo amnandi.
Intatheli ikhulume lomsunguli weqembu leMaqaqa, uMehluli Khabo ubike ukuba umculo wembube uyahlanganisa wonke umuntu njalo ulisiko likazulu.
“Umculo ohlanganisa abantu abanengi abatshiyeneyo ngumculo wembube. Lo ngumculo kamama welizwe lakithi. Ngokusekela umculo lo siyakholwa ukuba amasiko ethu ngeke atshabalale ngoba azabe egcinekile ngomculo wembube.
“Amasiko azagcineka kuhle, kalula ngokuhlabelela. Siyabonga kakhulu imicimbi efana lale eveza ukuhlonipha lokulandela amasiko ngomculo wembube,” kutsho uKhabo.
