Lovemore Dube
OLOLONGA onozinti kuqembu leStellenbosch kweleSouth Africa uPernell Mckop uthe kuligugu ukusebenza lamaWarriors.
UMichel Nees, inzalo yeGermany eyiyo ephiwe umsebenzi wokuqeqetsha amaWarriors kuviki edluleyo uqhatshe uMckop ukuthi abengomunye wabasekeli bakhe.
UMckop kukhangelelwe ukuthi uzalolonga onozinti beqembu labakhulu elizadlala leKenya leCameroon kunyanga ezayo kulizwe leUganda.
“Kuligugu ukuthi ngibizwe ukuthi ngisebenze loNees kumaWarriors. Ngilethemba ngizafunda okunengi ngokusebenza lendoda enjengaye,” kutsho uMckop.
UMckop uqhatshwe kweleSouth Africa lapho asebenza kubameli belizwe lelo kuConfederation of African Football Confederations Cup. Sebekubanga lesibili njalo bakhangelelwe ukuthi badlale le AS Vita yaseDemocratic Republic of Congo mhlazingu 12 kaMpandula.
Umqeqetshi wabonozinti lo uthe ubesalindele ukuthi iqembu lakhe lizwe kuZifa ngomsebenzi lo asewuphiwe. Uthe yena njengenzalo ethanda ilizwe lakhe lomdlalo kanobhutshuzwayo, uzimisele ukuba lilunga likaNees.
“Ngizimisele sibili ukusebenzela isizwe sakithi, okubambileyo yikuthi kufike incwadi yabeZifa ingicela kubaqhatshi bami sibesesikuthatha khonapho,” uMckop ekhuluma lentatheli kaZimpapers Sports Hub.
Iqembu lamaWarriors lizabuthana eKampala isigodlo seUganda ngeSonto kuthi mhlaka 6 Mpandula badibane leKenya kumdlalo weAfcon, besebengqikilana leCameroon kunkundla yeMandela Stadium.
Ngemva kwamalanga amabili uMckop ukhangelelwe ukuthi abeseKinshasa leqembu elimqhatshileyo leMzansi kuCaf Cup.
Esadlala, uMckop wabalilunga leCosmos, Highlanders, Eagles, leZimbabwe Saints.
Wabalenhlanhla yokunqoba kumaqembu aweHighlanders leZimbabwe Saints lapho athola khona iLeague lenkezo zeChibuku, Independence, Africa Day leZifa Cup.
Usesebenze kumaqembu anjengaboBay United, Ubuntu, FC AK, Black Leopards leMaritzburg United njalo uphethe amaphepha aweFifa, South Africa Football Association leFifa awokulolonga onozinti.
Umnawakhe uHenry ungumdlali wodumo owadlalela iZimbabwe Saints, Warriors, eGermany leMamemlodi Sundowns leWits kweleSouth Africa kuthi umfowabo umntakayise omdala uTyrone udlalele iCosmos, Young Warriors leHighlanders.
