uMthunywa
ABADALA babekuthanda kakhulu ukuthi beluleke abantu ngokuthi injobo enhle ithungelwa ebandla. Babetsho lokhu becebisa labo abalenhlupho ukuthi kuqakathekile ukuthi inhlupho zabo bazethule kwabanye abantu ukuze babancedise ukuzihluza.
Loba nje abanye babesithi hatshi ngeke bakwenze lokhu ukuhlinzela iqaqa ebandla, babekuphikisa lokhu abadala bathi yebo ye liyanuka iqaqa kodwa kanti kungathiwani nxa indaba kumele ilungiswe. Kumele sinanzelele ukuthi empilweni koniwa ngomlomo kuphinde njalo kulungiswe ngawo umlomo hatshi ngenduku, yikho nje okhokho baze bathi bona induku kayiwakhi umuzi.
Babekubonile ukuthi ababili ngeke bakhulume bayilungise indaba bengacinanga ngokuxabana, njalo bengaxabana bangacina belimazana kukanti ngokuthungela injobo ebandla, abantu bayancedisana, bayitshukisane, kuthi loba iqinile amadoda ayidonselane ize ivume ithungeke.
Yiwo-ke umsebenzi wabantu abadingwayo ukuthi bazoxazulula indaba yokungazwisisani. Ukuncedisana kuyabe kubalulekile ngalesi isikhathi. Banengi abantu abangadlala indima yokuxazulula ukungazwanani okukhona, kungaba ngosobhuku, induna, ababona ngokuhlalisana kwabantu ezigabeni abe-residence, abafundisi kanye lamapholisa ehofisini ebona ngobudlelwano babantu emakhaya.
Babekubonile njalo abadala ukuthi nxa abantu belenkulumo abangazwisisani ngayo nxa bephakathi kwebandla kunzima ukuthi balwe. Babesazi ukuthi bangaze bathukuthele njani kakho ongahle agalele omunye ngoba abanye bezalamula aze abhodle nxa kumele axolise aze akwenze lokho. Kodwa nxa abantu bebabili bayenelisa ukuthi balimazane omunye acine efile ngenxa yenkulumo encane nje ebingaqondiswa.
Kulengozi njalo yokuthi nxa abantu lingavele lizame ukukhulumisana lina livele lixabana kucina kulokulimazana kukanti nxa indaba ingethulwa ebadaleni balakho ukulihlalisa phansi balibuze ukuthi kuliqiniso yini lokho okulixabanisayo bazame ukuyixazulula indaba ikhulunywe ize iphele.
Kodwa kuba nzima ebadaleni ukuthi bathini nxa lina elingazwananiyo selikhethe ukuzilungisela indaba yenu kodwa isilehlule ngoba omunye ucina esekhethe ukuthi afake umthetho ezandleni zakhe.
Okusemqoka njalo okuswelekayo empilweni zabantu yikukhuluma. Kuthiwa umlomo litshoba lokuziphungela nje ngoba uqakathekile. Yiwo oxazulula zonke indaba hatshi induku ecina isetshenziswa linengi.
Asazi, kodwa esikucebisa uzulu yikuthi abantu kabafunde ukucabanga ngengqondo zabo hatshi ukulandela inhliziyo ngoba inhliziyo ingumkhohlisi omkhulu.
