uMthunywa
AMANZI yimpilo — ngamazwi ajwayelekileyo lawa ngoba phela umuntu kanye lazo zonke izinyamazana lezinanakazana zomhlaba ngeke zaphila zingelawo amanzi.
Abantu yibo abasebenzisa amanzi kakhulu ngoba bawasebenzisa ukupheka, ukuwatsha, ukuthelela, ukugezisa izinto ezitshiyeneyo lokunye nje esingeke sakubala sikuqede.
Kumaviki amabili adluleyo udaba obelusegudwini edolobheni lakoBulawayo belungolokuvalwa kwamanzi. Amalokitshi amanengi akuleli dolobho aqede insuku ezedlula itshumi bengela ngitsho lethonsi lamanzi ezimpompini ezisezindlini zabo.
Ukuswelakala kwamanzi kuludubo oluzwisa ubuhlungu kakhulu ngoba kungekho okungathatha indawo yamanzi. Amagetsi angaswelakala ezindlini abantu balakho ukupheka ngomlilo, abanye njalo ngegasi lokunye okwehlukeneyo, kodwa amanzi wona kuyabe kudingakala wona qha hatshi okunye.
Abantu basemalokitshini ambalwa bebewaginqela amanzi ngoba phela kwezinye indawo lezibholane kazikho kuthi lapho ezikhona abantu besebetshona baze balale bekundwendwe ezesabekayo belinde amanzi.
Abafana abagangileyo bona besebethatha lelithuba lokuswelakala kwamanzi ukuthi bathengisele abantu izigubhu zamanzi.
Lokhu bekungumkhuba omubi obususenziwa ngabatsha kungakho kuyadingeka ukuthi ngesikhathi esizayo nxa kulomsebenzi okumele wenziwe kuCriterion kumele ikhansili iqale ihlale phansi ichwayisise konke okumele kwenziwe ibe isibikela umphakathi ngokucacileyo ukuba amanzi azahlala insuku ezingaki hatshi ukuthi kucine kuqheliswa insuku.
Kuyadingeka futhi ukuthi ikhansili igebhe izibholane emalokitshini wonke ukuze nxa kungavalwa amanzi abantu benelise ukuwathola ezibholaneni eziseduzane labo hatshi ukuthi bahambe imango emide bewadinga.
Ngaphandle kokuthi ikhansili ibivale amanzi ngoba ilungisa impompi kuyaziwa ukuthi lapho okulamadamu okudonswa khona amanzi akoBulawayo komile, izulu alizange libe linengi okutsho ukuthi malutshwane amanzi asemadamu.
Ngalokhu kusegcekeni ukuthi vele amanzi lonyaka azakuba ludubo kulelidolobho kungakho kungaba ngumbono omuhle ukuba ikhansili ihle iqalise ukugebha izibholane kanye lamanye amadamu ukuze abemanengi kuminyaka ezayo okuzenza abantu bangadubeki.
Yinto engadingekiyo leyo ukuthi ichwayisiswe ngoba kuvele kusegcekeni. Njengoba amanzi eyimpilo kufanele-ke kubonakale ukuthi ayakhiwa amanye amadamu njalo zigejwe izibholane ukuze phela abantu bathole amanzi ngoba eyingxenye yempilo yabo.
Silethemba lokuthi ikhansili yakoBulawayo kanye loHulumende bazathatha amanyathelo ngaloludaba ngoba ukusilela kwamanzi kulakho njalo ukucina kubangela imikhuhlane efana le-cholera kanye le-typhoid.
Lengatsha ezizimele zodwa lazo silethemba ukuthi zizancedisa ngoba phela siyazi sonke ukuthi isandla sikaHulumende sifitshane, ngeke senelise ukugcwalisa izifiso zabantu bonke sizimele sodwa ilizwe lonke jikelele.
