uMthunywa
UMNTWANA wonke ulelungelo lokuthi athole imfundo njalo kuba yinto enhle kakhulu nxa efunda esikolo esiseduzane.
Akusinto enhle ukuthi umntwana akhasabule umango omude esiya esikolo ngoba lokho kungenza ukuthi ethi nxa efika esikolo abe esediniwe ehluleke ukufunda kuhle okungabangela ukuthi engabe esaphuma kuhle ezifundweni zakhe.
Kungaba yinto enhle ukuthi uHulumende kanye lalabo abaphathi bezikolo ezingayisizo zikaHulumende babone ukuthi abantwana kabahambi mango emide behambela izikolo.
KuloMnumzana Victor Moyo owakha isikolo elokitshini elitsha lePumula South, esibizwa ngokuthi yiTshebetshebe ukuze phela abazali bangahlupheki bedingela abantwababo indawo yesikolo endaweni ezikhatshana.
Kuhle njalo kulabo bantwana ngoba phela abasoze bahambe imango emide. Isikolo esakhiwa nguMnu Moyo ngesinye salezo ezizimeleyo esisemalokitshini.
Simtshayela ihlombe uMnu Moyo ngalokho akwenzileyo ngoba kuthuthukisa isizwe sakithi kwezemfundo njalo sithemba ukuthi uzaqhuba kuhle enelise ukuthi athole ingwalo lakho konke okufunekayo emfundweni yomntwana.
Isifiso esikhona yikuthi ngabe banengi abantu abanjengo Mnu Moyo abancendisa uHulumende ukuthi kweneliseke ukutholisa umntwana wonke imfundo ngoba phela uHulumende ezimele yedwa ngeke enelise ukwakha izikolo indawo zonke ezintsha.
Sonke siyazi ukuthi lokhu kubangelwa yibufitshane besikhwama lanxa nje isifiso sikhona sokwakha izikolo ngobunengi bazo.
Njengoba idolobho lakoBulawayo kanye lelizwe lonke jikelele likhula kusiba lamalokitshi amatsha akhiwayo sithemba kuzaba khona abanye abanjengo Mnu Moyo abazakubona kuyimfanelo ukuthi bancedise isizwe ngokwakha izikolo, ezemfundo ephansi, ephezulu kanye lamakolitshi ukuze phela labo abaqeda ezikolo bathole ithuba lokuthi bafundele imisebenzi etshiyatshiyeneyo ukuze bathole ulwazi olungabenza labo babe ngabantu abangcono empilweni.
Njengoba sitshilo ukuthi ilizwe lakithi liyakhula singalibali njalo ukuthi kulalabo abehlelwa yingozi yesiphepho sikaIdai eChimanimani labo ababhidlizelwa izikolo kubalulekile ukuthi abantu badonse bonke bakhe izikolo ezabhidlizwayo ukuze abantwana abakulezi indawo bafunde.
Kulabanye njalo abantu abalabantwana abahlaliswa kutsha emaphandleni endaweni ezingela zikolo. Abantwana laba kumele bathole imfundo kodwa uhlupho olukhona yikuthi azikho izikolo loba nxa zikhona zikhatshana kakhulu lemizi.
Ngalokho-ke sifisa kube khona oMoyo abanengi abazakwakha izikolo bengalindeli ukuthi njengoba uHulumende kunguye owahlalisa abantu kutsha nguye okumele azibonele ukuthi abantu bathole imfanelo zabo zonke.
Ilizwe leli ngelethu sonke ngakho-ke kasilisebenzeleni sindawonye ngoba akula muntu ozehla evela ezulwini ukuzosithuthukisela isizwe sethu ngaphandle kokuthi thina sizibone silomlandu wokulisebenzela ilizwe leZimbabwe.
Kungaba njalo sizabona ukuthi impilo iba lula ngoba phela zingakhiwa izikolo, bazafunda abantwana abayibo inkokheli zakusasa, babe ngababusi abalemfundo yabo enhle.
Njengoba nje kutshiwo ukuthi isizwe kumele siqakathekise ontanga labethu kumele sibaqakathekise futhi lokhu singakwenza ngokubona ukuthi bayathola konke okungabenza babengabantu ebantwini.
Hayi-ke wenze kuhle umfokaMoyo, kaqhubeke esebenza gadalala ngokuthuthukisa isizwe.
